جسٹس مظاہرنقوی کےاثاثوں کامعاملہ پبلک اکاؤنٹس کمیٹی کےحوالے

جمعرات کو ایوان کے اجلاس کے دوران لیگی رہنما، سابق اسپیکر اور وفاقی وزير ایاز صادق نے  یہ معاملہ اٹھایا، ان کا کہنا تھا کہ جسٹس مظاہر نقوی پر سنگین الزامات ہیں، انگلیاں اٹھ رہی ہیں،ہمارے لیئے سارے جج قابل احترام ہیں مگر  قومی اسمبلی کو اس اہم ایشو پر اپنا کردار ادا کرنا چاہیے، ایک جج کی وجہ سے باقی ججز کی بدنامی ہو رہی ہے جو افسوس ناک اور تکلیف دہ ہے۔

ایاز صادق نے کہا کہ جسٹس مظاہر نقوی کو اپنے اثاثے اور ذرائع آمدن بتانے چاہئیں تاکہ ان پر انگلیاں اٹھنے کا سلسلہ بند ہو جائے۔ پی اے سی  تحقیقات کر لے گی تو اس طرح باقی ججز پر سوالات بھی نہیں اٹھیں گے، جسٹس مظاہر علی نقوی بتائیں کہ  انہوں نے 1 کروڑ کا پلاٹ کیسے خریدا؟ اس پلاٹ کی مارکیٹ ویلیو کیا ہے؟ اس پرکتنا ٹیکس دیا؟ تعمیرکے پیسے کہاں سے آئے؟ وغیرہ وغیرہ

ایاز صادق نے مزید کہا کہ ایف بی آر سمیت دیگر اداروں سے کوآرڈینیٹ کرکے معاملے کی تحقیقات کی جا سکے گی، انہوں نے تجویز دی کہ ایف بی آر اور آڈیٹر جنرل کی جوائنٹ ٹیم اسپیشل آڈٹ کرے۔