کوہسار جنگلی سوروں کی افزائش سے گھمبیر مسائل کی آماجگاہ بن گیا

خطرناک ترین پہلو یہ ہے کہ deforestation  میں بھی سوروں کا بنیادی کردار ہے۔ جس کی واضح مثال یہ ہے کہ جب درختوں سے ان کے بیج زمین پر گرتے ہیں تو وہاں قدرتی عمل کے ذریعے پودے اگتے ہیں۔ پودوں کی نمو کے ساتھ ساتھ دوسری بیش قیمت جڑی بوٹیاں اور مشروم کی مختلف اقسام بھی جنگلات میں اگتی ہیں۔ لیکن سور ان مشروم سے اپنی خوراک کے حصول کے دوران زمین کی سطح کو تاراج کر دیتے ہیں جس کی وجہ سے خودرو ننھے پودے ضائع ہو جاتے ہیں۔ یوں یہ سور جنگلات کی بڑھوتری میں بتدریج کمی کے ساتھ ساتھ بیش بہا قیمتی جڑی بوٹیوں کے خاتمے کا باعث بن رہے ہیں
4- ماحول :  یہ ایک بدیہی حقیقت ہے کہ سور جنگلات کی تباہی کا باعث ہیں۔ نتیجتا ماحول کی تباہی، ایکو سسٹم کا ڈسٹرب ہونا، بہتے چشموں کی پراگندگی، ہوا کی کوالٹی کا کمزور ہونا، نایاب نباتات کے عنقا ہونے سے ماحول پر اثرات بد کے بارے میں کسی وضاحت کی ضرورت نہیں۔ ان سوروں کی موجودگی اور ان کی افزائش میں مسلسل اضافے سے ماحول کو شدید خطرات کا سامنا ہے۔
5- محکمہ وائلڈ لائف : (جنگلی حیات) ۔ جنگلی حیات کے تحفظ کا یہ محکمہ اس علاقے میں اپنے قیام سے لےکر آج تک اپنی بنیادی ذمہ داریوں کو نبھانے میں کلی طور پر ناکام رہا ہے۔ جس کی بہت سی مثالیں یہاں کے باسیوں کے ساتھ پیش آنے والے آئے روز کے واقعات اور حادثات سے پیش کی جا سکتی ہیں۔  کبھی جنگلی چیتے اور دوسرے خطرناک جنگلی جانور یہاں کے باسیوں کے مال مویشیوں کو جان سے مار جاتے ہیں تو کبھی انسانی زندگیاں داؤ پر لگ جاتی ہیں۔ پہلے تو بات کروڑوں کے نقصان کی تھی جو جنگلی سوروں نے مقامی زراعت اور باغبانی کو مکمل طور پر تباہ کرنے سے کیا لیکن تباہی یہاں پر ہی رکی نہیں بلکہ اب تو یہ جنگلی سور انسانی جانوں کے بھی درپے ہو چکے ہیں۔ اس کے باوجود ان واقعات کی روک تھام کے لیے اس محکمے کی طرف سے کوئی عملی اور ٹھوس اقدامات نہیں کیے گئے۔ جس کی وجہ سے یہاں کے مکینوں میں ڈر اور خوف کی فضا پیدا ہو چکی ہے۔

وقت کا تقاضا ہے کہ علاقے کے تمام عوام باہم متحد ہو کر اس ناسور سے چھٹکارا پانے کے لیے لائحہ عمل طے کریں اور اس پر عمل کے لیے عملی طور پر اپنا کردار ادا کریں۔