اج فتح علی، "ٹیپو سلطان” ہوراں ناں شہادت تیہاڑا آ

ٹیپو سلطان ہور 10 اکتوبر 1750 وچ شیر میسور حیدر علی ہوراں نے کہر جمے۔ حیدر علی ہوراں میسور نے راجے نے طور اپر گوریاں نی فوج کی کئی واری جنگاں ہرایاں تے میسور نی تغڑی فوج نے نال نال عام لوکاں نی خشی خوشحالی کی وی یقینی بنایا۔

ٹیپو سلطان ہوراں نی تربیت وی اسے ماحول وچ ہوئی۔ انھاں کی نکی عمرے وچ یے کھیہڑنے کدنے تے کھلاڑاں کہٹھیاں کرنے نے بجائے بندوقاں، تیراں تے تلواراں نال واہ پئیا تے جوانی توڑی پوہچنے سی پہلیاں یے اوہ چنگے فوجی کمانڈر بنی چکے سے۔

ٹیپو سلطان ہک جرنیل، سیاست نے ماہر تے حکومت تے لڑائی نے بہترین ناظم نے طور اپر مشہور ایسے۔ انھاں دینی علوم نی تعلیم نے نال نال کئی زباناں اپر وی عبور حاصل کیتا۔ انھاں دکھی کہندا سا جے ایسٹ انڈیا کمپنی فوجی طاقت بدھانی جلنی اس واستے انھاں فرانس‘ ترکی تے افغانستان نال دفاعی معاہدے کیتے۔

4 مئی 1799 کی ہندوستان وچ انگریزاں نے خلاف جنگ تے جہدی کرنے آلے آخری راجے فتح علی، "ٹیپو سلطان” ہوراں شہادت ناں پیالہ پی تے مسلمان نوجواناں کی یوء سنیہا دتا نے جے تاریخ صرف انھاں لوکاں ناں ذکر اپنے ورقیاں اپر کرنی جیہڑے غلامی ناں بدر گلے وچ نیہے باہنے تے آزادی تے حریت واستے حضرت امام حسین نی سنت اپر عمل کرنیاں جان تک قربان کری شوڑنے۔

جسلے لارڈ ولزلی کی ٹیپو سلطان نی شہادت نی خبر لبھی تے اس اچی آواز وچ نعرہ ماریا۔۔۔۔

’’ہن ہندوستان ساہڑا  آ‘‘