کوٹلی ستیاں میں تحریک انصاف کے معروف رہنما احسان ستی کو فائرنگ کر کے قتل کر دیا گیا جبکہ ان کا ایک ساتھی جاوید عباسی گولی لگنے سے زخمی ہوگیا،واردات کے بعدملزمان موقع سے فرارہو گئے۔
تفصیلات کے مطابق پی ٹی آئی کے مقامی رہنما راجہ احسان ستی جمعرات کی شام اپنی گاڑی پر کوٹلی ستیاں کے علاقے سانٹھ سرولہ سے گزر رہے تھے کہ مسلح افراد نے ان کی گاڑی پر فائرنگ کردی، جسکے نتیجے میں راجہ احسان ستی شدید زخمی ہو گئے،انیہں فوری طور پر شدید زخمی حالت میں تحصیل ہیڈکوارٹر ہسپتال منتقل کیاگیا، تاہم پولیس ذرائع کے مطابق راجہ احسان ستی زخموں کی تاب نہ لاتے ہوئے جان کی بازی ہار گئے جبکہ ان کے ساتھی جاوید عباسی زخمی ہوگئے۔ بعض ذرائع کا کہنا ہے کہ احسان ستی کسی تنازعے کے سلسلے میں جرگہ اٹینڈ کر کے واپس آ رہے تھے کہ انہیں نشانہ بنایا گیا۔ پولیس ذرائع کا کہنا ہے کہ ابتدائی تحقیقات کے مطابق واقعہ دیرینہ دشمنی کا شاخسانہ معلوم ہوتا ہے ،
سی پی او راولپنڈی نے واقعے کا نوٹس لےکرایس ایچ اوکوٹلی ستیاں کو ملزمان کی گرفتاری کا حکم دے دیا، ان کا کہنا ہے کہ تمام پہلوؤں کو مدنظر رکھ کر واقعے کی تحقیقات کی جا رہی ہے۔ حکام کے مطابق فوری طور پرموقع سے شواہد اکٹھے کرلیے گئے ہیں، ملزمان کوگرفتارکرکے کیفر کردار تک پہنچایا جائے گا۔
