عید پر مری میں مقررہ تعداد سے زائد گاڑیوں کے داخلے پر پابندی

نگران وزیراعلیٰ محسن نقوی نے مسافروں سے زائد کرایہ وصول کرنے والے ٹرانسپورٹر زکے خلاف کارروائی کا حکم دیتے ہوئے کہا ہے کہ اوورچارجنگ کے حوالے سے مسافرو ں کی شکایات کسی صورت قابل قبول نہیں۔زائد کرایہ وصول کرنے والے ٹرانسپورٹرز کے خلاف بلاتفریق ایکشن لیا جائے۔محکمہ ٹرانسپورٹ اورانتظامیہ کے افسران فیلڈ میں موجود رہیں۔بس اڈوں پر چیکنگ کی جائے اور اوورچارجنگ پر کارروائی یقینی بنائی جائے۔مسافروں سے زائد کرایہ وصول کرنے کی ہرگز اجازت نہیں دیں گے۔

وزیر اعلٰی نے کہا کہ جہاں شکایت ملی، بلامتیاز ایکشن لیا جائے گا۔ نگران وزیراعلیٰ محسن نقوی نے لاہور، مری اور دیگر سیاحتی مقامات پر عید کے موقع پر خصوصی انتظامات کا حکم دیتے ہوئے کہا کہ لاہور، مری اور دیگر بڑے شہروں میں ٹریفک مینجمنٹ کیلئے بہترین اقدامات ہونے چاہئیں۔ سیاحتی مقامات سمیت تمام شہروں میں صفائی اور امن و امان پربھر پورتوجہ دی جائے۔صفائی کے ناقص انتظامات برداشت نہیں کروں گا۔عید کی تعطیلات کے دوران صفائی یقینی بنانے کیلئے تمام وسائل بروئے کار لائے جائیں۔

نگران وزیراعلیٰ محسن نقوی نے کہا کہ عید تعطیلات کے دوران مری جانے والے شہریوں کو کسی قسم کی مشکلات پیش نہیں آنی چاہئیں۔مری میں مقررہ تعداد سے زائد گاڑیوں کے داخلے کی روک تھام یقینی بنائی جائے اور ٹریفک رواں دواں رکھنے کیلئے موثر حکمت عملی کے تحت اقدامات کو حتمی شکل دی جائے۔ ایس او پیز پر عملدرآمد کیا جائے اور ٹریفک کی صورتحال کے بارے میں سیاحوں کو لمحہ بہ لمحہ گائیڈ کیا جائے۔ انہوں نے کہا کہ ہوٹلوں میں اوورچارجنگ روکنے کیلئے متعلقہ عملہ جانفشانی سے فرائض سرانجام دے۔زائد کرایہ وصول کرنے والوں اور پارکنگ کے نام پر لوٹ مار کرنیوالو ں کیخلاف بلاامتیاز کارروائی کی جائے۔محسن نقوی نے کہا کہ  کھانے پینے کی اشیاء کے معیار پر کوئی سمجھوتہ نہیں ہوگا۔کھانے پینے کی اشیاء کی چیکنگ کی جائے اور غیر معیاری اشیاء فروخت کرنیوالوں کیخلاف ایکشن لیا جائے۔

علاوہ ازیں سیاحتی مقامات اور پارکوں میں بچوں کےجھولوں کی سیفٹی یقینی بنائی جائے۔ پارکوں کے جھولوں کے معیار کو جانچ کر باقاعدہ سرٹیفکیٹ لیا جائے۔ سینئر انتظامی اور پولیس افسران تمام انتظامات کی خود نگرانی کریں۔ نگران وزیراعلیٰ محسن نقوی نے ون ویلنگ کی روک تھام کے حوالے سے موثر اقدامات کرنے کی ہدایت کرتے ہوئے کہا کہ ون ویلنگ کرنے والوں کے خلاف بلاامتیاز کریک ڈاؤن کیا جائے۔جس ضلع سے ون ویلنگ کی شکایت سامنے آئی متعلقہ پولیس افسر کے خلاف کارروائی ہوگی۔