انداز نظر بدلو، حالت جے بدلنی آ

دنیا جگتی گراں (گلوبل ویلیج) بنی گئی تے سوشل میڈیا اس جگتی گرائیں نے لوکاں کی آپس وچ جوڑنے ناں بستوں (اوزار) بنی گا ۔ انٹرنیٹ، میڈیا، آئی ٹی تے ٹیلی کمیونیکیشن ہک انقلاب برپا کری شوڑیا۔ علامہ اقبال ہوراں آخیا سا۔۔۔
محو حیرت ہوں کہ دنیا کیا سے کیا ہو جائے گی

پر اساں ناں مسئلہ یوء آ جے اساں کسے وی چیز ناں مثبت پہلو دکھنے نے بجائے اس نے منفی پہلو کی مرچاں مصالحے لائی تے دنیا جہان وچ کھلارنے آں۔

فر اساں بے حد جذباتی لوک یاں۔ تے تاریخ گواہ ای جے ساہڑی اس کمزوری کولا ہمیشاں شریکاں (دشمناں) فائیدہ چایا۔

اساں کی ہک بہوں بڑی خش فہمی یا غلط فہمی یاء وی تھئی جے اساں ددھے نے تہوتے ہوئے آں۔ اساں وچ کوئی کمی، کوئی خرابی کوئی برائی تھئی یے نیئی۔ ساری دنیا کی ساہڑا ساڑا کھاناں۔ ساہڑے نال کدے چنگا نآء ہوناں تے اس وچ ساہڑا کوئی قصور ناء بلکن یاء ساہڑے دشمناں نی چال ای۔ اساں کی کدے توفیق نہئی ہوئی جے اپنے اخلاق تے کردار ناں محاسبہ کری تے اپنیاں کمیاں کوتاہیاں دور کراں۔

اساں مذہب نال جذباتی وابستگی رکھنے آں۔ عبادتاں اپر زور دینے آں۔ حلیے تے لباس نے معاملے وچ ساہڑا رویہ بے انتہا سخت آ۔ پر ساہڑے معاملات دین نے احکامات نے بلکل برخلاف اے۔ جھوٹ بولنیاں، منافقت کرنیاں، ملاوٹ کرنیاں، لوکاں ناں حق مارنیاں، تہوخا دینیاں، سود ناں لین دین کرنیاں، رشوت کہننیاں تے دینیاں، ماہتڑاں (کمزوراں) اپر ظلم کرنیاں، بڈیار (تکبر) جیئا گناہ کرنیاں اساں کی کدے وی دین نیاں تعلیمات نئیاں یاد اشنیاں۔

ساہڑے کول بدقسمتی نال کوئی لیڈرشپ یے نیئی جیہڑی اساں نی تربیت کرے تے مستقبل نیاں خطریاں تے سامراج نیاں چالاں ناں توڑ دسے ۔ اساں کی زندگی ناں مقصد سمجھی تے سر چائی تے جینے نی راہ دسے۔ سامراج باقاعدہ منصوبہ بندی کری تے اساں کی قرضیاں نے جالے وچ بندی وان بنائی تے ساہڑے وسائل اپر قبضہ کری کہندا۔ انھاں ساہڑی اشرافیہ وچا میر جعفراں تے میر صادقاں نے ذریعے ساہڑی آزادی اساں کولا کھوسی کہندی (چھین لی)۔ تے قدرتی وسائل نے خزانیاں نے باوجود اساں کی ڈنگراں جیئی زندگی گزارنے اپر مجبور رکھیا۔ ہن تے حلال رہانوں (حرام) مال دولت جمع کری تے ایہے جیئے لوک وی سیاسی لیڈر بنی گئے جنھاں کول کدے پیسہ نہ ویہہ تے کوئی انھاں نال دعا سلام کرنا وی پسند نہ کرے۔ اجیئا قحط الرجال شاید یے ساہڑی تاریخ نے کسے دور وچ رہیا ویہہ۔

(مکالمے نی روایت کی وی گنی سمجھی (جان بوجھ کر ختم کیتا گا۔۔ اساں نی آں نویاں نسلاں کی اس گل ناں علم یے ناء جے مدلل، صحت مند تے مثبت اختلاف کسرے کیتا گشناں۔ نکتہ نظر نے اختلاف کی دشمنی تے شریکا سمجھیا گشناں، جس ناں نتیجہ نسلاں نی دشمنی نی صورت وچ نکلنا۔

انھاں ساری آں گلاں ناں دکھ اپنی جائی آ پر سب سی بڑا دکھ یوء آ جے ساہڑے لوکاں کی اس کہاٹے اپر کوئی افسوس یا پچھتاوا نآء۔ حضرت اقبال ہوراں نے الفاظ وچ ۔
وائے ناکامی متاع کارواں جاتا رہا
کارواں کے دل سے احساس زیاں جاتا رہا

کسے ناخوشگوار فیصلے اپر احتجاج کرنا عوام ناں مڈھلا (بنیادی) حق آ۔ مغربی دنیا وچ وی احتجاج ہونے رہنے۔ کئی واری تے لکھاں لوک مظاہریاں وچ شامل ہونے۔ پر اتھیں قومی املاک ناں پائی پیسے نا نقصان ناء ہوناں۔ راہ نیہے بند کیتے گشنے۔ کسے اپر زبردستی نیئی کیتی گشنی۔ ٹریفک ناں نظام نآء روکیا گشناں۔ اوہ لوک پلے کارڈز اپر اپنے مطالبے لخی تے دنیا کی دسنے تے غلطی یا زیادتی نی نشان دہی کرنے تاں جے اس ناں ازالہ کیتا گچھے۔ کدے پولیس نال ہاتھا پائی وی ہوئی گچھے تے لوک پستول تے کلاشنکوفاں نیہے کڈھنے تے نانہہ یے اگ لائی تے پولیس نیاں گڈیاں ساڑنے۔

کدے اساں دکھیے تے ساہڑے ہاں معاملہ اس نے بلکل الٹ آ ۔ اساں سب تھی پہلیاں سڑکاں بند کرنے آں۔ سرکاری املاک کی برباد کرناں فرض سمجھنے آں۔ جیہڑا ساہڑے احتجاج وچ شامل نہ ویہہ اس کی دائرہ اسلام وچا خارج سمجھنے آں تے اس کی ملک تے دین نے دشمن ناں فتوی لائی تے مارنا وی جائز سمجھنے آں۔

گزارش یاء کرنی سی جے جسلے اساں فساد پھیلانے آں، سرکاری املاک تباہ کرنے آں، لوکاں ناں نقصان کرنے آں، رستے بند کرنے آں، کاروبار زندگی بند کرنے آں، ٹریفک کی روکی شوڑنے آں، توڑ پھوڑ تے تشدد نی راہ اپر ٹرنے آں تے دراصل اساں ملک نے دشمناں نے منصوبے کامیاب کرے ای لگے ہوئے ہونے آں۔

اسلام اساں کی کسے صورت وچ رستے بند کرنے نی اجازت نآء دینا۔ فتنے کی قتل سی بڑا جرم قرار دینا۔ برے القاب سی کسے مسلمان کی یاد کرنے سی منع کرنا۔ تہمت تے بھتان کی کبیرہ گناہ دسناں۔ اساں کی یاد رکھنا چائیناں جے مسلمان بد تہذیب تے بداخلاق ہوئی یے نآء سکنا۔