تین برس پہلےیوکرینی طیارہ مار گرانے والے ایرانی فوجیوں کو سزا

یاد رہے کہ جنوری 2020ء میں ایران کی فوج نے تہران میں یوکرین کے طیارے کو 2 میزائل حملوں سے مار گرایا تھا، واقعے میں جہاز میں سوار عملے سمیت تمام 176 افراد ہلاک ہوگئے تھے۔ ایرانی خبر ایجنسی کے مطابق  طیارہ گرانے کے واقعے پر عدالت نے فوج کے کمانڈر کو 13 سال جبکہ دیگر اہلکاروں کو ایک سے 3 سال تک قید کی سزا سنائی ہے۔ رپورٹ کے مطابق عدالت نے ملزمان کو طیارہ حادثے کے متاثرین کے لواحقین کو معاوضہ دینے کا بھی حکم دیا، ایران کی جانب سے سزا پانے والے سیکورٹی اہلکاروں کی شناخت ظاہر نہیں کی گئی۔

ایرانی میڈیاکے مطابق مقدمے میں 117 مدعی شامل تھے، جن میں سے 55 نے عدالت میں گواہی دی جبکہ 20 کے وکلا نے ان کی نمائندگی کی۔ یوکرین ایئر لائنز کے تباہ ہونے والے طیارے میں سوار مسافروں کی اکثریت ایرانی شہریوں کی تھی جبکہ طیارے میں کینیڈا، یوکرین، برطانیہ اور افغانستان کے مسافر بھی سوار تھے۔ ایران نے ابتدائی طور پر طیارے کو میزائل حملوں سے تباہ کرنے کی ذمہ داری لینے سے انکار کردیا تھا لیکن 3 دن بعد طیارہ گرانے کا اعتراف کرتے ہوئے اسے ایک تباہ کن غلطی قرار دیا تھا۔