آزاد کشمیر میں نئے وزیر اعظم کا انتخاب پھر کھٹائی میں پڑ گیا

ذرائع کے مطابق بیرسٹرسلطان نے پیپلزپارٹی پر واضح کر دیا ہے کہ وہ چوہدری یاسین کووزیر اعظم قبول نہیں کریں گےتا ہم اگر وہ سردار یعقوب یا فیصل ممتاز راٹھور کو عبوری مدت کے لیے وزیراعظم نامزد کرتے ہیں تو ان کا ساتھ دے سکتے ہیں۔ ذرائع کے مطابق بیرسٹرسلطان کی ایک شرط یہ بھی ہے کہ بعد ازاں وہ خود وزیراعظم عہدے پر آئیں گے تاہم دوسرے فریق کیلئے ان کی یہ شرط قابل قبول نہیں ہے۔

دوسری طرف معزول وزیراعظم تنویر الیاس نے عمران خان سے ملاقات کرکے جب بتایا کہ بیرسٹرسلطان نے اگر ہمارا ساتھ نہ دیا تو اپنا وزیر اعظم نہیں لا سکے گی۔ اس پر عمران خان نے کہا کہ کسی کی بلیک میلنگ میں نہ آئیں اور ان کی ہدایت پر تنویر الیاس، اسد قیصر اور پرویز خٹک نے اسلام آباد میں بیرسٹر سلطان کے ساتھ مذاکرات کئے تو انہوں نے ایک بار پھر شرط رکھی کہ چوہدری رشید کو عبوری مدت کے لئے وزارت عظمی کے لیے لایا جائے تاکہ وہ کچھ عرصے بعد ان کی جگہ خود لے سکیں ۔تاہم تحریک انصاف کی پارلیمانی پارٹی نے اس کی مخالفت کی جس کے بعد عمران خان کو صورت حال سے آگاہ کیا گیا تو انہوں نے ہدایت کی کہ کسی دباؤ میں آئے بغیر نئے امیدوار کا فیصلہ کیا جائے۔ ان کا کہنا تھا کہ وہ ہفتے کے روز خود امیدوار کا اعلان کریں گے تاہم تحریک انصاف ہفتے کی شام تک کسی نام پر متفق نہیں ہو سکی تھی۔ یہی وجہ ہے کہ اسمبلی اجلاس کورم کا بہانہ کر کے اتوار تک کیلئے ملتوی کردیا گیا۔