آزاد کشمیر کی وزارت عطمٰی کیلئے آج حتمی معرکہ ہو گا

اب تک متحدہ اپوزیشن کا موقف واضح ہے اور اس کی جانب سے چوہدری محمد یاسین وزیراعظم کے لئے مضبوط امیدوار بن کر سامنے آئے ہیں ۔جن کا دعوی کیا ہے کہ تحریک انصاف کے فاروڈ بلاک کے نصف درجن سے زائد ارکن سمیت  انہیں 30 ارکان اسمبلی کی حمایت حاصل ہے۔ دوسری جانب صدر بیرسٹر سلطان محمود چوہدری کے حمایت یافتہ ممبران اسمبلی کا دھڑا اپنا قائد ایوان لانے کا خواہاں ہے تاہم چوہدری محمد یاسین نے پی ٹی آئی کے متحارب دھڑے کی فرمائش قبول کرنے سے انکار کر دیا ہے ۔

یادر ہے کہ جمعہ کے روز آزادکشمیر قانون ساز اسمبلی میں قائد ایوان کا انتخاب ہونا تھا لیکن کورم پورا نہ ہونے کی وجہ سے قائد ایوان کا انتخاب نہیں ہو سکا ،آج ہفتے کے روزقانون ساز اسمبلی کے اجلاس میں وزیراعظم کا انتخاب کیا جائے گا ۔ادھر سابق وزیراعظم و صدر پی ٹی آئی آزادکشمیر سردار تنویر الیاس خان کئی پی ٹی آئی ارکان اسمبلی کے ہمراہ دارالحکومت مظفر آباد پہنچے ہیں ، جہاں وزیراعظم ہاؤس میں سابق اسپیکر قومی اسمبلی اسد قیصر،  سابق  وزیردفاع پرویز خٹک سے سردار تنویر الیاس خان کی پی ٹی آئی پارلیمانی پارٹی کے ممبران اسمبلی کے افطار ڈنر کے دوران خوشگوار ملاقات ہوئی ،تنویر الیاس کے مطابق تحریک انصاف آزادکشمیر نئے قائد ایوان کے انتخاب کیلیے متحد ہے۔

تحریک انصاف کی جانب سے موسٹ سینئر وزیر خواجہ فاروق احمد، سپیکر قانون ساز اسمبلی چوہدری انوارالحق، اور وزیر چوہدری اظہر صادق کے علاوہ چوہدری رشید کے نام وزارت عظمی کے امیدوار کے طور پر سامنے آ چکے ہیں۔ان میں سے چوہدری رشید کو فیورٹ قرار دیا جا رہا ہے جنہیں بیرسٹر سلطان کی حمایت حاصل ہے۔

واضح رہے کہ آزاد کشمیر قانون ساز اسمبلی میں پیپلز پارٹی کی 12، مسلم لیگ (ن) کی 7 اور جموں و کشمیر پیپلزپارٹی کی ایک نشست ہے،اس طرح  پی ڈی ایم جماعتوں کی آزاد کشمیر اسمبلی میں کل 20 نشستیں ہیں۔وزیراعظم بنانے کیلئے پی ڈی ایم جماعتوں کو 7 مزید ارکان کی حمایت درکار ہے،اسمبلی میں اس وقت کل 52 ارکان ہیں جن میں سے 31کا تعلق تحریک انصاف سے جبکہ 12پیپلز پارٹی اور 7ن لیگ سے ہیں ،

پیپلز پارٹی اور مسلم لیگ ن کے درمیان طے پائے جانے والے پاور شیئرنگ فارمولے کے تحت آزاد کشمیر میں وزارت عظمی کا امیدوار پیپلز پارٹی سے ہو گا۔آزاد کشمیر کی وزارت عظمیٰ کے انتخاب کے لئے 53 رکنی الیکٹورل کالج میں سے سابق وزیر اعظم سردار تنویر الیاس کی نااہلی کے بعد 52 اراکین اسمبلی ووٹ کا حق استعمال کر سکیں گے۔ پیپلز پارٹی اور مسلم لیگ ن پر مشتمل اتحاد کا یہ دعوی ہے کہ تحریک انصاف کے  اراکین اسمبلی کی مطلوبہ تعداد  ہمارے ساتھ رابطے میں ہے اور ہم وزارت عظمی کا انتخاب جیتنے میں کامیاب ہو جائیں گے۔

سیاسی مبصرین کے مطابق اسلام آباد میں سیاسی موسم کی تبدیلی کے پیش نظر  امکان ہے کہ متحدہ اپوزیشن قائدایوان منتخب کرنے میں کامیاب ہو جائے گی۔