✨ غزل ✨

دست دعا اٹھائے تو اک عمر ہو چلی
کوئی قدم اٹھاؤ کہ زنجیر پا گرے

پل بھر کا معرکہ ہے جو سودا سروں میں ہو
دن رات کی دہائی سے دیوار کیا گرے

اندھی ہوا کے وار چراغوں پہ ہیں مگر
کچی منڈیر بھی نہ کہیں سر پہ آ گرے

پنجرے میں پر سنوارنے والوں کو کیا خبر
ہو کر لہو لہان کہاں ، پرکشا گرے

ساماں کیا گیا ہے ہماری نجات کا
سائے جو سارے شہر پر بن کر "بلا” گرے

یوسف یہ آندھیاں تو شجر بھی گرا گئیں
ہم دیکھتے رہے نہ کوئی گھونسلا گرے

۔۔۔۔۔۔۔۔۔۔۔۔۔۔۔۔۔۔۔۔۔۔۔ یوسف حسن