امام ولیدکےکندھے پر سوار بلی کی ویڈیو نے تمام ریکارڈ توڑ دیئے

ایک ویڈیو جو آپ کی نظر سے بھی گزری ہوگی۔یقینا آپ نے سرسری سا دیکھنے کے بجائے بے ساختہ مکمل دیکھی ہوگی اور پھر مسکرا دیئے ہوں گے۔
جی ہاں۔۔۔الجزائر کے ایک خوش الحان قاری امام ولید مھساس نماز تراویح کے دوران اپنی خوبصورت آواز میں تلاوت فرما رہے ہیں۔نہایت سکون کے ساتھ۔۔۔کہ اچانک ایک بلی آ کر ان پر سوار ہو نے کی کوشش کرتی اور جبے کے ساتھ کھیلنے لگتی ہے۔پھر ان کے اوپر کندھوں تک آجاتی ہے۔اس تمام وقت میں لمحے بھر کو بھی قاری صاحب کے ارتکاز میں ذرا فرق نہیں آتا۔کوئی بے چینی، الجھن۔۔۔کچھ بھی نہیں۔اسی سکون سے ندی کے دھیمے بہاؤ جیسی تلاوت جاری ہے۔بلی کندھوں تک آ جاتی ہے۔وہ برابر مہربانی سے پیش آتے ہیں۔بلی کندھے پر سوار ہو جاتی ہے۔چہرے سے اپنا چہرہ یو ٹکراتی ہے جیسے کسی بچے کا محبت بھرا بوسہ ہو۔اور پھر اتر کر واپس چلی جاتی ہے۔
قارئین یہ ایک چھوٹا سا واقعہ تھا۔ لیکن ایک مسلمان کی حلیم طبیعت اور شفقت کے انداز نے غیر مسلموں کے دل موہ لیے۔یہاں تک کہ امریکی سی این این چینل اپنے انسٹاگرام پر امام ولید مھساس کی ویڈیو نشر کرتا ہے۔تو غیر مسلموں کے تبصرے کس قدر خوبصورت آتے ہیں۔۔آئیے چند تبصرے آپ بھی پڑھیے ۔
1-بلی نے بھی سکون محسوس کیا۔
2-میں نہیں جانتا کہ وہ کیا کہہ رہا ہے،لیکن وہ بہت خوبصورت ہے۔
3-خدایا،اس نے میری ساری پریشانی دور کر دی۔یہ کتنا خوش گوار لمحہ ہے۔
4-میں اس دعا کی طاقت کو محسوس کرتا ہوں۔
5-عیسائی ہوں،لیکن مجھے اسلام بہت پسند ہے۔
6-میں کیتھولک ہوں۔لیکن میں اسلام کی تعریف کرتا ہوں۔”
اللہ اکبر۔۔۔۔جسے چاہے عزت سے مالامال کر دے۔خیال رہے کہ گفتار سے زیادہ کردار طاقت رکھتا ہے۔اگر ہم باکردار مسلمان بن جائیں تو لاکھوں لوگوں کو اللہ کے دین میں داخل ہوتے دیکھیں گے۔
جہاں امام ولید کا بلند اخلاق،شفقت کا رویہ انہیں وزارت مذہبی امور کی جانب سے خصوصی انعام و شیلڈ کا حق دار ٹھہرا گیا۔وہیں اس کلپ نے چوبیس گھنٹوں میں ایک ارب سے زائد ویوز لینے کا ریکارڈ حاصل کیا۔