اعلیٰ عدلیہ میں پونے چار لاکھ مقدمات کے التواء کا شکار ہونے کا انکشاف

جمعرات کے روز  وقفہ سوالات میں تحریری جواب جمع کراتے ہوئے  وزیر قانون نے ایوان کو بتایا کہ گزشتہ 5 سال سے اعلیٰ عدلیہ میں کل 3 لاکھ 80 ہزار436 مقدمات زیر التوا ہیں۔صرف سپریم کورٹ میں 5 سال سے 51 ہزار 744 مقدمات زیر التوا ہیں جبکہ اسلام آباد ہائی کورٹ میں 17 ہزار 104 مقدمات التوا  کا شکار ہیں۔انہوں نے بتایا کہ لاہور ہائی کورٹ میں 5 سال سے زیر التوا مقدمات کی تعداد 1 لاکھ 79ہزار 425 ہے جبکہ سندھ ہائی کورٹ میں یہ تعداد 85 ہزار781 ہے۔

وزیر قانون کا مزید کہنا تھا کہ اس کے علاوہ پشاور ہائی کورٹ میں بھی 41 ہزار911 مقدمات زیر التوا ہیں جبکہ بلوچستان ہائیکورٹ میں 4 ہزار 471 مقدمات التوا کا شکار ہیں۔یاد رہے کہ رکن قومی اسمبلی نزہت صادق پٹھان نے اعلیٰ عدلیہ میں 5 سال سے زیرالتوا مقدمات کی تفصیل طلب کی تھی۔