لاہور میدان جنگ بنا رہا ۔ پولیس شیلنگ سے تحریک انصاف کارکن جاں بحق

پولیس کی جانب سے شیلنگ اور لاٹھی چارج کے نتیجے میں تحریک انصاف کے متعدد کارکن زخمی ہوگئے جبکہ تحریک انصاف کے مظاہرین کی جانب سے پتھراؤ کے نتیجے میں درجن کے قریب پولیس اہلکار بھی زخمی ہوگئے۔ تحریک انصاف کے ڈنڈا بردار کارکن سڑکوں پر نکل آئے جنھیں کنٹرول کرنے کے لیے پولیس نے طاقت کا استعمال کیا۔
پولیس کی جانب سے لاؤڈ اسپیکر پر اعلان کرکے دفعہ 144 کی خلاف ورزی پر کارروائی کے انتباہ پر مظاہرین اور پولیس میں  تصادم شروع ہو گیا جو وقفے وقفے سے کئی گھنٹے تک جاری رہا۔
تحریک انصاف کے کارکنوں نے مظاہرین کو کنٹرول کرنے کے لئے لائی جانے والی واٹرکینن پر بھی ہلہ بول دیا جبکہ پولیس نے واٹرکینن کے ساتھ آنسو گیس کا اندھا دھند استعمال کیا۔اس دوران پی ایس ایل میچ کھیلنے والے غیر ملکی کھلاڑیوں کو سخت سیکورٹی کے ساتھ اسٹیڈیم منتقل کرنا تھا جبکہ دوسری طرف تحریک انصاف کے مشتعل کارکن پولیس کے ساتھ تصادم کی حالت میں تھے۔ تحریک انصاف نے دعویٰ کیا ہے کہ ان کے ڈیڑھ سو سے زائد کارکنوں کو گرفتار کیا گیا تھا تاہم پولیس کی جانب سے ایک درجن سے زائد لوگوں کو حراست میں لینے کی تصدیق سامنے نہیں آ سکی ۔
پولیس اور پی ٹی آئی کارکنوں کے درمیان جھڑپوں کا سلسلہ زمان پارک کے گردونواح ، شاہراہ قائداعظم اور مال روڈ سمیت دیگر علاقوں میں جاری رہا۔ اسی دوران تحریک انصاف کا یہ دعوی سامنے آیا کہ ان کا ایک کارکن پولیس تشدد سے جاں بحق ہوگیا ہے جبکہ ذرائع کا کہنا ہے کہ علی بلال نامی یہ کارکن شیلنگ سے زخمی ہوا تھا جو بعد ازاں چل بسا۔
تحریک انصاف کے سربراہ عمران خان نے مرحوم علی بلال کے والد کو زمان پارک بلا کر ان سے ملاقات کی اور حکومتی ذمہ داروں کے خلاف قتل کا مقدمہ درج کرنے کا عندیہ دیا ہے ۔
تحریک انصاف اور پولیس کے درمیان تصادم کا سلسلہ جاری تھا کہ اسی دوران عمران خان کی جانب سے یہ اعلان سامنے آیا کہ انتخابی ریلی ملتوی کردی گئی ہے ۔ ان کا کہنا تھا کہ حکومت کشیدگی کی فضا پیدا کر کے انتخابات سے فرار اختیار کرنا چاہتی ہے تاہم اسے اپنے مقصد میں کامیاب نہیں ہونے دیں گے۔