آرمی چیف نے بزنس کمیونٹی کو تحفظ کا یقین دلادیا

وزیر خزانہ اسحاق ڈار نے تاجر برادری کو آئی ایم ایف پروگرام پر بریفنگ دی جبکہ آرمی چیف نے اعتماد دلایا۔

ذرائع کے مطابق اس ملاقات میں زیادہ تر معاشی معاملات پر گفتگو ہوئی تاہم کچھ سیاسی معاملات بھی زیر بحث آئے۔ اسحاق ڈار نے مستقبل کی معاشی توقعات کے حوالے سے اعداد و شمار بتائے۔وزیر خزانہ نے بزنس کمیونٹی کو یقین دلایا کہ آئی ایم ایف سے جلد اسٹاف لیول معاہدہ ہوجائے گا ، جون میں ہم عالمی ادارے کا یہ پروگرام مکمل کریں گے اور پھر آئندہ کی معاشی حکمت عملی کے حوالے سے اپنے آپشنز دیکھیں گے۔

اسحاق ڈار کا کہنا تھا کہ آئی ایم ایف کا رویہ ماضی میں کبھی اتنا سخت نہیں رہا ، اس وقت آئی ایم ایف پروگرام کے ذریعے پاکستان کو مجبور کیا جا رہا ہے سخت سے سخت شرائط منوائی جاسکیں، چین کو یہ بات سمجھ آگئی تھی اس لیے چین سے پاکستان کو فوری طور پر ڈپازٹس مل گئے، مگر آئی ایم ایف کے اسٹاف لیول معاہدے کے ساتھ دیگر دوست ممالک، بین الاقوامی اداروں سے بھی پیسے مل جائیں گے اور صورت حال بہتر ہوجائے گی۔