سردارمہتاب پارٹی قیادت اورحکومت پربرس پڑے،نوازلیگ نہ چھوڑنے کا عزم

نواز لیگ کے پی کے جنرل سیکرٹری اور وفاقی وزیر مرتضٰی جاوید عباسی وزیر اعظم شہباز شریف کے ساتھ 

سردار مہتاب احمد عباسی نے کہا کہ  تاریخ گواہ ہے کہ پاکستان پر ہمیشہ مخصوص ٹولہ قابض رہا ہے ، یہاں ہر سیاسی جماعت اسٹیبلشمنٹ کی نرسری سے نکلی، اب وقت آگیا ہے کہ عوام کو ان کی مرضی کے مطابق ملک چلانے دیا جائے ۔سردار مہتاب کا کہنا تھا ملک اس وقت خطرناک دور سے گزر رہا ہے۔ انہوں نے نواز لیگ سے علیحدگی کی خبروں کی تردید کرتے ہوئے کہا کہ میں پارٹی نہیں چھوڑ رہا،میں نے اپنی نوجوانی اس ملک کو دی۔اس پارٹی نے مجھے جو عزت اور مقام دیا اسے میں نے ماتھے کا جھومر بنایا مگر آج مسلم لیگ کو جان بوجھ کر تباہ کردیا گیا ۔

ان کا کہنا تھا کہ آج پاکستان کو معاشی تباہی کے دہانے پر پہنچا دیا گیا ہے۔ حکومت میں شامل پی ڈی ایم کی دیگر جماعتیں تو دامن بچا لیں گی ، مگر  ساری بدنامی شہبازشریف کے حصے میں آئے گی ۔آج مہنگائی کا یہ عالم ہے کہ آٹا ڈیڑھ سو روپے کلو پرپہنچ چکا ہے ۔ہمارا وزیر منہ کالا کر کے آئی ایم ایف کے ملازمین کے سامنے ہاتھ باندھے بیٹھا ہے۔ انہوں نے سوال اٹھایا کہ بدترین معاشی حالات میں 80 رکنی وفاقی کابینہ کا کیا جواز ہے ؟انہوں نے کہا پارلیمنٹ ملک کی نمائندگی نہیں کر رہی بلکہ یہ کسی کام کی نہیں رہی۔ پی ٹی آئی کی ناکام حکومت کو عدم اعتماد لا کر اس جماعت کو مضبوط کیا گیا۔

سردار مہتاب ورکرز کنونشن سے خطاب کرتے ہوئے

سردار مہتاب نے الزام لگایا کہ مسلم لیگ کے پی کی قیادت ذاتی مفادات کا تحفظ کر رہی ہے جس  نے پیسے کمانا شروع کر دئیے ہیں۔ان پالیسیوں کی وجہ سے نواز لیگ کا کے پی، سندھ اور بلوچستان سے خاتمہ ہو چکا ہے۔ نواز لیگ صرف پنجاب تک مضحدود ہو کر ریہ گئی ہے۔سردار مہتاب خان کا مزید کہنا تھا کہ ضمنی انتخابات کا کوئی فائدہ نہیں، یہ فضول مشق ہو گی۔انہوں نے کہا کہ  مسلم لیگ نواز میں اب سب سے زیادہ متکبر لوگ ہیں۔ دیگر جماعتوں کی طرح یہاں بھی پیسے کا راج ہے، اختلاف رائے رکھنے والے ہماری طرح کے لوگ منہ چھپا رہے ہیں جبکہ دوسری قسم کے لوگ دندنا رہے ہیں۔

سردار مہتاب کا کہنا تھا کہ اگر کے پی کیلیگی  قیادتتبدیل نہ کی گئی  تو مسلم لیگ کا ٹکٹ لینے والا کوئی نہیں ہو گا۔ انہوں نے کہا کہ مریم نواز کی آج ایبٹ آباد آمد کے موقع پر کارکنان کو ہدایت کی ہے ان کے خلاف کوئی احتجاج نہ کیا جائے۔  کوئی ہماری عزت کرے یا نہ کرے، ہماری روایات ہیں کہ کوئی مہمان آئےتو اس کی عزت میں کمی نہیں آنے دی جائے۔ مریم نواز شریف کی بیٹی ھے اور نواز شریف نے ہمیشہ ایبٹ آباد کو عزت دی مگر اس وقت مسلم لیگ خیبر پختون خواہ کو ایک نااہل ٹولے کے سپرد کیا گیا ہے ، جس نے جماعت کو تباہ کر دیا اس صوبائی قیادت کی موجودگی میں مسلم لیگ دھڑے بندی اور تباہی کی طرف جارہی ھے۔ فوری طور پر مسلم لیگ کی صوبائی قیادت کو فارغ کرکے حقیقی کارکنوں کو عزت دی جائے ۔