ہم پوٹھوہاری کیا چاہتے ہیں

نادرا اور مردم شماری سے پوٹھوہاری زبان کے اخراج کے رد عمل میں خطہ پوٹھوہار کے باسیوں میں اپنی مادری زبان سے محبت کی نئی اور تازہ دم لہر بیدار ہوئی ہے۔ پوٹھوہاری زبان پر ”متواتر”حملوں سے خطہ پوٹھوہار کی شعر و ادب اور سول سوسائٹی سے وابستہ شخصیات میں بے چینی اور غم و غصہ کا پیدا ہونا فطری امر ہے۔ اہل پوٹھوہار کے حقیقت پر مبنی اس رد عمل پر پوٹھوہاری زبان کے کچھ دیرینہ ”کرم فرما” اسے اپنے اپنے معانی پہنانے میں مگن ہیں۔ ہم پوٹھوہاری زبان کے ان ناقدین یا مخالفین سے بس اتنا عرض کرنا چاہتے ہیں کہ آگے بڑھیں اور دلیل اور مکالمہ کے ذریعے اپنا موقف پیش کریں۔ پوٹھوہاری کے ماہرین لسانیات ہر پلیٹ فارم پر پوٹھوہاری زبان کی قدامت اور جداگانہ تشخص کو ثابت کرنے کیلے تیار بیٹھے ہیں۔  لیکن ناقدین دلیل اور صحت مند مکالمہ کی طرف آنے کی بجائے سوشل میڈیا پر مخالفت برائے مخالفت پر سارا زور صرف کیے ہوئے ہیں۔

پوٹھوہاری زبان میں قرآن پاک کا ترجمہ، سیرت رسول ۖ پر 2 کتب، 3 پوٹھوہاری اردو لغات، 5 پوٹھوہاری ناول، پوٹھوہاری گرائمر اور قاعدے، پوٹھوہاری ضرب الامثال کی 2 کتب، پوٹھوہاری پہیلیوں کی ایک کتاب، بچوں کی کہانیاں، پوٹھوہاری کالموں کا مجموعہ، متعدد افسانوی اور شعری مجموعے، تراجم سمیت 100 کے قریب کتب شائع ہو چکیں جبکہ قرآن پاک کا ایک ترجمہ، شادی بیاہ پر گائے جانے والے پوٹھوہاری لوک گیتوں کی ایک کتاب، ایک ناول سمیت تین درجن سے زائد پوٹھوہاری کتب اشاعت کی منتظر ہیں۔ اتنے زرخیز ادبی پس منظر کی حامل زبان پر حملے سمجھ سے بالا تر ہیں۔ ان ناقدین کے لئے بس اتنا عرض ہے کہ ہم پوٹھوہاری اپنی مادری زبان کےلئے حقوق ملکی سلامتی اور یکجہتی کو داؤ پر لگا کر ہرگز طلب نہیں کر رہے ہیں۔ ہم صرف انھی بنیادی حقوق اور احترام کا تقاضا کر رہے ہیں جو دیگر زبانوں کو ایک مدت سے حاصل ہیں۔ ہمارے لیے تمام زبانیں قابل احترام ہیں۔ ہم اپنی مادری زبان پوٹھوہاری کی آڑ میں کسی دوسری زبان کی تحقیر یا مخالفت کے ہرگز قائل نہیں ہیں۔ ہم موجودہ سسٹم میں رہ کر ہی اپنا بنیادی حق اور اپنا حصہ مانگ رہے ہیں۔

ہم پوٹھوہاری لسانی بنیادوں پر صوبوں کے قیام کے نہ پہلے حامی تھے اور نہ ہی اب حامی ہیں۔ ہم انتظامی بنیادوں پر چھوٹے یونٹس یا صوبوں کے قیام کے حامی ہیں۔ انتظامی بنیادوں پر اگر صوبے بنائے جاتے ہیں تو ہم بھی” صوبہ پوٹھوہار” یا ”صوبہ شمالی پنجاب” کو خوش آمدید کہیں گے۔