شیخ رشید رات گئے مری کی حدود سے گرفتار

شیخ رشید کے خلاف آبپارہ تھانے میں درج مقدمے میں بار بار انہیں طلب کیا جا رہا تھا تاہم وہ پیش نہیں ہو رہے تھے۔ پولیس نے انہیں گزشتہ روز شام چار بجے تک کا آخری وقت دیا تھا تاہم شیخ رشید احمد نے اپنے وکیل کے ذریعے ایک درخواست جمع کرائی تھی جس میں آصف زرداری پر لگائے گئے الزامات سے لاتعلقی ظاہر کی گئی ۔پولیس نے یہ درخواست کو قبول کرنے سے انکار کر دیا تھا۔

واضح رہے کہ شیخ رشید احمد نے آصف زرداری پر الزام لگایا تھا کہ وہ عمران خان کو قتل کرانے کے لیے دہشت گردوں کے خدمات حاصل کر چکے ہیں۔ اسی بنیاد پر ان کے خلاف مقدمہ درج کیا گیا۔ شیخ رشید نے اپنے تازہ بیان میں کہا تھا کہ انہوں نے آصف زرداری پر براہ راست الزام نہیں لگایا بلکہ عمران خان کے بیان کی بنیاد پر بات کی تھی ۔

دوسری طرف گرفتاری کے بعد شیخ رشید کا کہنا تھا کہ عدالت اس مقدمے میں ان کی ضمانت منظور کر چکی ہے اور پولیس کا نوٹس معطل کردیا گیا تھا۔ انہوں نے اپنی گرفتاری کو نواز لیگ کی حکومت اور وزرا کی انتقامی کارروائی قرار دیتے ہوئے کہا کہ ان کے گھر کے دروازے اور کھڑکیاں توڑی گئی ہیں اور ان کے ملازمین کو بے تحاشہ مارا گیا ہے۔ دوسری طرف شیخ رشید کے بھتیجے راشد شفیق نے اپنے چچا کی گرفتاری کی تصدیق کرتے ہوئے کہا ہے کہ انہیں ان کے گھر سے پکڑا گیا ہے تاہم انھوں نے یہ واضح نہیں کیا کہ وہ لال حویلی کی بات کر رہے ہیں یا کسی اور گھر کی۔