مری میں حساس ادارے کا افسربن کر پروٹوکول لینے والا بہروپیاگرفتار

تفصیلات کے مطابق خودکوحساس ادارے کا اعلی افسراورڈائریکٹراینٹی کرپشن ظاہر کرنے والے بہروپئے اور اس کے ساتھی جعلی ایس ایس جی کمانڈو کو گاڑی سمیت مری پولیس نےحراست میں لے لیا ہے ۔ ملزمان مختلف ہوٹلوں میں چیکنگ کے نام پر پروٹوکول لیتے رھے۔ بدھ کی شام سٹی ٹریفک پولیس کے انچارج شفیق الرحمن نے شک پڑنے پر گاڑی سمیت روکا تو مذکورہ افراد اپنی شناخت کے حوالے سے مبہم اور متضاد باتیں کرتے رہے۔ کبھی خود کو فوجی افسر اور اپنے ساتھی کو کمانڈو ظاہر کیا تو کبھی ڈپٹی ڈائریکٹر اینٹی کرپشن ہونے کا دعوی کیا۔ مری پولیس اور ایم پی پولیس نے بعد ازاں ملزمان کو حراست میں لے لیا۔

ملزمان لگژری گاڑی پر سرکاری نمبرپلیٹ۔وائرلیس سیٹ۔پولیس ہوٹرز بھی استعمال کر رہے تھے جبکہ جعلی کمانڈونے حساس ادارے کی یونیفارم اور بیج لگا رکھے تھے۔ ملزمان کے خلاف مقدمہ درج کر لیا گیا ہے اور مزید تفتیش جاری ہے۔