زرداری پرالزامات سے شیخ رشید پسپا، پولیس نے بیان مسترد کر دیا

عوامی مسلم لیگ کے سربراہ شیخ رشید نے اپنے وکیل کے ذریعے بیان تھانہ آبپارہ میں جمع کروایا ہے جس میں کہا گیا ہے کہ میں نے آصف زرداری پر عمران خان کے قتل کا الزام از خود عائد نہیں کیا ۔میرے خلاف تھانہ آبپارہ میں جمع کرائی گئی درخواست سراسر جھوٹ پر مبنی ہے۔درخواست گزار نے جعلی شناختی کارڈ نمبر لکھ کر اپنی شناخت چھپائی ہے۔

شیخ رشیدکا کہنا ہے کہ میں نے آصف زرداری کے حوالے سے عمران خان کے بیان کا حوالہ دیا تھا۔ میرے پاس اس معاملے کے نہ تو کوئی شواہد ہیں اور نہ ہی میرا اس معاملے سے کوئی تعلق ہے۔

دوسری طرف اسلام آباد پولیس نے شیخ رشید کا جواب مسترد کرتے ہوئے انہیں یکم فروری کی شام ذاتی حیثیت میں پیش ہونے کا حکم دیا ہے۔پولیس حکام کے مطابق وکیل کے ذریعے جواب قابل قبول نہیں ، شیخ رشید سابق صدر پر عائد کیے گئے الزام کا ثبوت پیش کریں اس سلسلے میں ان کے پس یکم جنوری کی شام  4 بجے تک پولیس کے روبرو پیش ہونے کا آخری موقع ہے۔ ترجمان کا کہنا تھا کہ شیخ رشید انکوائری میں تعاون نہیں کر رہے ۔ خود  پیش ہو کر اپنے بیان کی وضاحت کریں ورنہ قانونی کارروائی ہوگی۔

واضح رہے کہ شیخ رشید کے خلاف ایک  شہری کی جانب سے تھانہ آبپارہ میں درخواست جمع کرائی گئی تھی۔