کوہاٹ میں مدرسے کے 12 طالب علم ڈوب کر جاں بحق

کوہاٹ کے تاندہ ڈیم میں کشتی ڈوبنے کے نتیجے میں پکنک منانے کے لیے آنے والے مدرسے کے بارہ بچے جاں بحق ہوگئے۔ چھ بچوں کو زندہ بچا لیا گیا ،جبکہ کشتی بان سمیت 14 بچے شام گئے تک لاپتہ بتائے جاتے تھے۔ تمام طالب علموں کی عمریں 8 سے 14 برس بتائی جاتی ہیں۔
مقامی مدرسہ سے تعلق رکھنے والے یہ بچے پکنک منانے کے لیے کشتی میں سوار ہوکر ڈیم کی دوسری طرف جا رہے تھے ۔ ذرائع کا کہنا ہے کہ مدرسے کے طالب علموں سمیت کشتی میں 30 مسافر سوار تھے۔ جب کہ کشتی میں کل 15 مسافروں کی گنجائش تھی جس کی وجہ سے کشتی اپنا توازن برقرار نہ رکھ سکی اور حادثے کا شکار ہو گئی۔ حادثے کی اطلاع ملتے ہی پاک بحریہ اور ریسکیو کے اہلکار اور مقامی غوطہ خور موقع پر پہنچ گئے جنہوں نے فوری کارروائی کرتے ہوئے باقی بچوں کو بچا لیا جبکہ پشاور سے بھی غوطہ خوروں کی خصوصی ٹیم روانہ کی گئی۔
المناک واقعے کے بعد بچوں کی لاشیں جب ڈیم کے کنارے لائی گئیں تو ایک کہرام مچ گیا۔