شاعری ۔۔۔۔۔۔ لامحدود سمتوں کا اقلیدس

پیش کش کے اعتبار سے شاعری ایک ایسے ماحصل کی طرح ہے جس کے خام مواد کو شاعر اپنے داخل کی ریفائنری میں تصعید و تجلیل کے نہایت پیچیدہ عمل سے گزارتا ہے۔ محسوسات کی سطح پر شاعری ایک ناتمام سچائی ہے، اصل کا محض دھندلا سا عکس اور بعض حالتوں میں قول محال یا متناقض بالذات یعنی پیراڈاکس۔ پورا سچ کون لکھ سکتا ہے ! اور پورا دکھ کون بانٹ سکتا ہے ! شاعری میں راست لکیروں کے بجائے علامتوں ، دائروں، قوسوں اور کثیر جہتی سطحوں کا عمل دخل زیادہ ہوتا ہے۔ یہی وجہ ہے کہ اسے ناپنے ، جانچنے ، پرکھنے کا کوئی حتمی کلیہ موجود نہیں۔ تاہم معیاری اور غیر معیاری اور سچی اور جھوٹی شاعری کے بیچ چند وضع کردہ بنیادی اصولوں یا پیمانوں کے علاوہ بھی کوئی نہ کوئی حدِ فاصل ضرور ہوتی ہے اور آفاقی سچائیوں، آفاقی شاعری کے راستے کہیں اسی حدِ فاصل سے پھوٹتے ہیں۔

اس سے یہ نتیجہ نکالا جا سکتا ہے کہ سچی اور معیاری شاعری وہ ہے جس میں آفاقیت ہو۔ لیکن یہ بات بھی صرف ایک حد تک یا ضمنی طور پر درست ہے، حتمی نہیں۔ دوسری بات یہ کہ شاعری محض چند اوزان و بحور کی پابندی کا نام نہیں، یہ تو لاتعداد اور لامحدود سمتوں کا اقلیدس ہے۔ اس کا اپنا علامتی و استعاراتی اور فکری و ثقافتی نظام ہوتا ہے، پیکر تراشی ہوتی ہے، اسرار و رموز کی ، محسوسات کی ایک انوکھی دنیا ہوتی ہے جو بیک وقت فرد، سماج اور کائنات کے ظاہر و باطن سے منسلک ہوتی ہے۔ ماضی، حال اور مستقبل کی رو میں شاعری کئی اطراف میں سفر کرتی ہے۔ اس کا کوئی ایک نقطہ اتصال تلاش کرنا، معیار کے کسی ایک ثقہ سانچے میں ڈھال کر کوئی حتمی تعریف بیان کرنا مشکل ہے۔ شاعری ہمیشہ ہی سے کائنات اور انسان کے اندر موجود ہے۔ اظہار کی سطح پر یہ کب اور کیسے الفاظ کا روپ دھار لیتی ہے، یہ ہر شاعر کا انفرادی زائیدہ ہوتا ہے۔….