کے پی میں نگراں کابینہ کی تشکیل کھٹائی میں پڑ گئی

ذرائع کے مطابق گورنر حاجی غلام علی اور نگران وزیر اعلیٰ اعظم خان نے نگران کابینہ کیلئے مشاورت کا فیصلہ کیا تھا،  اس سلسلے میں جب سابق وزیر اعلیٰ محمود خان کو دعوت دی گئی  تو انہوں نے مشاورتی عمل کا حصہ بننے سے انکار کر دیا۔ محمود خان کے انکار کے بعد صوبائی کابینہ کی تشکیل کا مشاورتی عمل کھٹائی میں پڑنے کا خدشہ ہے۔

قبل ازیں گورنر  غلام علی اور خیبرپختونخوا کے سابق اپوزیشن لیڈر اکرم درانی کے درمیان گورنر ہاؤس میں ملاقات ہوئی جس میں کابینہ  کی تشکیل کے معاملے پر مشاورت کسی حتمی نتیجے پر نہیں پہنچ سکی۔

ذرائع کا بتانا ہےکہ حکومتی جماعتوں کے اتحاد  پاکستان ڈیموکریٹک موومنٹ  نے نگران کابینہ کیلئے 16 سے 18 ناموں کی فہرست تیارکر رکھی ہے جبکہ وزیراعلیٰ اعظم خان مختصر کابینہ بنانے کے حامی ہیں۔