پہاجی مر گئے!!

ہنس مکھ اور خوش مزاج، ہنسی مذاق میں ایسی مہارت اور بے ساختگی کہ روکھے پیکھے لوگوں کو بھی ہنسنے پر مجبور کر دیں۔ہم عمر تو ہم عمر، چھوٹوں اور بڑوں سے بھی مذاق کیا کرتے تھے لیکن اس میں حفظ مراتب کا خاص خیال رکھاکرتے تھے۔گاؤں کی زندگی میں مہمانداری ایک اہم کام ہوتا ہے۔ خوشی غمی کے موقع پر لوگ دور دراز سے آتے ہیں۔ مہمانوں کی خدمت کرنا، انھیں بٹھانے کے لیے اڑوس پڑوس سے کرسیاں، کھانے کے برتن جمع کرنا،پانی بھروانا، اپنی نگرانی میں کھانا تیار کرانا، مہمانوں کو کھانا کھلانا اور پھر برتن سمیٹ کر دھلائی کے لئے خواتین کے حوالے کرنا، کس مہمان نے کھانا کھایا ہے اور کس نے نہیں یہ سب پہاجی نے سنبھالا ہوتا تھا۔

بچوں کا بہت خیال رکھا کرتے تھے اور بچے بھی ان سے بہت محبت کرتے تھے۔ جب ہماری مسجد میں ان کی وفات کا اعلان ہوا تو میری سات سالہ بیٹی زار وقطار رونے لگی۔ آج صبح پتا چلا کہ جب یہ ان کے گھر جایا کرتی تھی تو وہ اس سے باتیں کرتے اور کہتے کہ میری کوئی بیٹی نہیں ہے تم میری بیٹی بن جاؤ“ اور کئی دفعہ اس کو کنگھی کرا کر بھیجا کرتے۔میرا خیال ہے ہم بھائیوں میں شاید وہ سب سے کم پڑھے لکھے تھے۔ لیکن ان میں بعض غیر معمولی خوبیاں ان کی ڈورِ کردار کو سیرت رسول سے ملا دیتی تھیں۔ کل ایک صاحب ان کے بارے میں کہہ رہے تھے کہ جی وہ بہت سوشل تھے تو مجھے سخت اعتراض ہوا میں نے کہا آج کل اکثر و پیشتر سوشل ہونا فیشن ہے جب کہ ہمارے پہاجی تو ہمدرد اور غمخوار تھے۔”سارے جہاں کا درد ہمارے جگر میں ہے“ کی مثال۔

کئی دفعہ ہماری والدہ مرحومہ کا ذکر خیر کرتے ہوئے ان کی آنکھوں میں آنسو آ جاتے۔ہماری تائی جان کی بیٹی ایک ہی تھی اور وہ بھائیوں میں سب سے چھوٹی تھی۔تائی جان بہت زیادہ بیمار رہا کرتی تھیں تو گھر کے کام کاج میں نسیم الحق بھائی ہی ا ن کا ہاتھ بٹایا کرتے حتی کہ جھاڑو تک دے دیا کرتے تھے۔ ہمارے معاشرے میں مَردوں کا دودھ دوہنا پہلے تو بہت بڑا عیب سمجھا جاتا تھا اور اب بھی کم و بیش یہی صورت حال ہے۔ پہاجی نہ صرف اپنی بھینس بکری کا دودھ، دوھ لیا کرتے تھے بلکہ خوشی غمی کے مواقع پر اڑوس پڑوس تک کی بھینس کا دودھ بھی نکال دیا کرتے ۔ تو یہ اوصاف لاجواب ہیں اور ہمیں نظر آتا ہے کہ یہ تو رسول اللہ ﷺ کی سنت کی پیروی ہے۔ روایات میں آتا ہے کہ رسول اللہﷺ اپنے کام کاج خود کرتے، اپنے جوتے گانٹھ لیتے، اپنے کپڑوں میں سے جوئیں دیکھ لیا کرتے، نہ صرف اپنے جانوروں کا دودھ نکال لیا کرتے بلکہ دوسروں کے جانوروں کا دودھ بھی دوھ دیا کرتے اور اپنے گھر والوں کی خدمت کیا کرتے۔

پہاجی کی اس کردار سازی میں، میرا نہیں خیال کہ مکتب کی کوئی کرامت پوشیدہ ہو مجھے تو سراسر”فیضان نظر“دکھائی دیتا ہے جو ان کی والدہ کی خدمت گزاری کے صلے میں ان کا عطا ہوا تھا۔پہاجی اپنی والدہ کی ایک خاص خدمت کیا کرتے تھے کہ ان کے سر میں جوئیں دیکھ لیا کرتے تھے۔ مجھے تو اس سعادت پر رشک آتا ہے اور وہ حدیث رہ رہ کہ یاد آتی ہے کہ رسول اللہ ﷺ ایک دن بیدار ہوئے تو فرمانے لگے”میں نے جنت کو دیکھا اور وہاں کسی قاری کی تلاوت کی آواز سنی، میں نے پوچھا کہ یہ کون ہے تو مجھے بتایا گیا کہ یہ حارثہ بن نعمان ہیں پھر حضور نے فرمایا کہ ہاں ماں کی خدمت کا یہی صلہ ملتا ہے۔حارثہ رضی اللہ عنہ کے بارے میں آتا ہے کہ اپنی ماں کے خدمت گزارتھے اور ان کے سر سے جوئیں نکالاکرتے تھے،،ہم دعا کرتے ہیں کہ اللہ تعالٰی پہاجی کو حضرت حارثہ بن نعمان والا اجر عطا کرے۔پہاجی کی ذات میں بہت سی خوبیاں تھیں لیکن ان میں ایک بہت بڑی خامی اور برائی بھی تھی اور وہ یہ کہ اتنی جلدی ہم سے بچھڑ گئے:

لوگ اچھے ہیں بہت دل میں اتر جاتے ہیں

اک برائی ہے تو بس یہ ہے کہ مر جاتے ہیں