ایڈوائس پر دستخط سے گورنر انکاری، پنجاب اسمبلی ازخود تحلیل ہو گئی

تاہم گورنر پنجاب بلیغ الرحمان نے اسمبلی توڑنے کی ایڈوائس پر دستخط نہ کرنے کی وجہ بیان کرتے ہوئے لکھا ہے کہ میں اسمبلی کی تحلیل کے عمل کا حصہ نہیں بنوں گا۔ ایسا کرنے سے آئینی عمل میں کسی قسم کی رکاوٹ کا اندیشہ نہیں کیوں کہ آئین اور قانون میں صراحت کے ساتھ تمام معاملات کے آگے بڑھنے کا راستہ دیا گیا ہے۔
یہ امر قابل ذکر ہے کہ گورنر نے اسمبلی کی تحلیل کے بعد پرویزالہی یا کسی دوسری شخصیت کو نگراں وزیر اعلی مقرر ہونے تک بطور وزیر اعلی کام کرنے کی ہدایت جاری نہیں کی بلکہ آئین کے عین مطابق سابق قائد اعظم چوہدری پرویز الہی اور قائد حزب اختلاف حمزہ شہباز سے کہا ہے کہ وہ دونوں اتفاق رائے سے نگراں وزیر اعلی کا نام انہیں تین دن کے اندر بھیج دیں۔ واضح رہے کہ نگران وزیر اعلی کے تقرر تک سابق وزیراعلی اس عہدے پر فائز رہ سکتے ہیں جبکہ اسمبلی کی مدت پوری ہونے اور نئی اسمبلی کے انتخاب تک اسپیکر اپنے عہدے پر برقرار رہیں گے۔ ذرائع کا دعویٰ ہے کہ نگران وزیر اعلی کے تقرر تک پرویز الہی اس منصب پر کام کرتے رہیں گے۔

دوسری طرف ذرائع کا کہنا ہے کہ نگران سیٹ اپ کے حوالے سے عمران خان کل پرویزالٰہی سے ملاقات کریں گے۔ زمان پارک میں ہونے والی اس ملاقات میں نگران سیٹ کے لیے ناموں پر مشاورت ہوگی۔ بعد میں اتفاق رائے سے یہ نام گورنر کو بھیجے جائیں گے۔ واضح رہے کہ آئین کے مطابق نگران وزیراعلی کے لیے قائد ایوان اور قائد حزب اختلاف تین تین نام پیش کرتے ہیں۔ اگر ان میں سے کسی نام پر بھی اتفاق رائے نہ ہو تو پھر عدالت فیصلہ کرتی ہے۔