سانحہ مری کو ایک سال مکمل ۔ جی پی او چوک پر دعائیہ تقریب کا انعقاد

سانحہ مری کا ایک سال مکمل ہونے پر ہفتے کے روز جی پی او چوک مری میں ایک دعائیہ تقریب منعقد کی گئی جس کی صدارت ڈپٹی کمشنر مری نے کی۔ اس موقع پر سانحہ میں جاں بحق ہونے والے افراد کے لیےفاتحہ خوانی کی گئی اور ایک منٹ کی خاموشی بھی اختیار کی گئی ۔
واضح رہے کہ گزشتہ برس سات جنوری کو برفانی طوفان کے نتیجے میں پھنس جانے والے سیاحوں میں سے 22 ابدی نیند سو گئے تھے۔ یہ ملکہ کوہسار مری کی تاریخ کا المناک ترین واقعہ تھا جس میں اتنی زیادہ جانیں ضائع ہوئیں۔اس سانحے کی تحقیقات کیلئے سپریم کورٹ  نے ایک خصوصی بینچ تشکیل دیا تھا جس نے چند ماہ قبل سانحہ کے حوالے سے اپنا فیصلہ سنایا تھا۔ اس فیصلے میں انیس کے قریب انتظامی محکموں اور اداروں کو واقعے کا ذمہ دار قرار دیا گیا تھا۔جبکہ آئندہ ایسے سانحات سے بچنے کے لئے گائیڈ لائن بھی فراہم کی گئی تھی۔
سانحہ مری کے بعد حکومتی سطح پر جو اقدامات کیے گئے ان میں مری کو تحصیل سے اپ گریڈ کر کے ضلع کا درجہ دینا بھی شامل ہے۔ اس حوالے سے بنیادی اقدامات اٹھا لیے گئے ہیں جن میں ڈی پی او ، ڈپٹی کمشنر اور دیگر انتظامی عہدوں پر افسران کا تقرر شامل ہیں تاہم ذرائع کا کہنا ہے کہ ضلع کے انتظامی انفراسٹرکچر کی تکمیل میں ابھی کئی مراحل باقی ہیں جن میں ضلعی ہیڈ کوارٹر کے مقام کا تعین ، عمارات کی تعمیر ، ٹرانسپورٹ سمیت دیگر ضروری سہولیات کی فراہمی کے علاوہ درکار اسٹاف کی تقرری بھی شامل ہے۔