بیرسٹر سیف کے وارنٹ گرفتاری کیوں جاری ہوئے ؟

سینئیر سپیشل مجسٹریٹ سی ڈی اے سردار آصف نے ملزم محمد علی سیف کی مسلسل عدم حاضری پر وارنٹ گرفتاری جاری کیے ہیں۔

ذرائع کا کہنا ہے کہ بیرسٹر سیف کے وارنٹ گرفتاری ایس ایچ او تھانہ بھارہ کہو کو ارسال کردیئے گئے ہیں۔عدالت کی جانب سے اسلام آباد پولیس کو حکم دیا گیا ہے کہ وہ بیرسٹر محمد علی سیف کو 11 جنوری کو گرفتار کرکے پیش کرے۔

واضح رہے کہ وزیر اعلی کے پی کے مشیر بیرسٹر محمد علی سیف کے خلاف مارگلہ کی پہاڑیوں پر توڑ پھوڑ کرکے قدرتی حسن تباہ کرنے پر 2018ء سے مقدمہ زیر سماعت ہے۔

یہ مقدمہ لینڈ سکیپ آرڈیننس اور انوائرمنٹل ریگولیشن 2008ء اور ایم ایل آر 82 کے تحت مقدمہ درج کیا گیا تھا۔ عدالت کی جانب سے مسلسل طلبی کے باوجود بیرسٹر سیف حاضر نہیں ہو رہے تھے جس کے بعد ان کے وارنٹ جاری کیے گئے ہیں۔ واضح رہے کہ بیرسٹرسیف ماضی میں پرویز مشرف کے قریبی ساتھی رہے ہیں اور وہ متحدہ قومی موومنٹ کے ٹکٹ پر سینیٹر منتخب ہوئے تھے۔