عوام کیلئے سستی سواری کیوں ؟بھارہ کہو مری شٹل بس سروس میں مقامی ٹرانسپورٹررکاوٹ بن گئے

تفصیلات کے مطابق بھارہ کہو سے مری لاری اڈہ شٹل بس سروس کے آغاز پر ہی مقامی ٹرانسپورٹروں کی طرف سے مزاحمت سامنے آ رہی ہے۔ ان کا کہنا ہے کہ فی کس 100 روپے فی سواری سے مقامی پبلک ٹرانسپورٹرز کو نقصان ہو گا انہوں نے اعلان کیاکہ ہم یہ بس سروس نہیں چلنے دیں گے ۔ اس صورتحال سے سی ڈی اے حکام بھی پریشان ہو گئے ہیں جبکہ جمعرات کو لاری اڈہ مری میں کئی گھنٹے بس کو روک کر رکھا گیا ۔ڈسٹرکٹ وتحصیل انتظامیہ کی طرف سے ٹرانسپورٹروں کو مطمئن کرنے کی کوشش بھی ناکام رہی۔ ذرائع کا کہنا ہے کہ سی ڈی اے حکام کی طرف سے مسائل حل ہونے تک شٹل بس سروس کو معطل رکھنے پر غور شروع کر دیا گیا ہے ۔

دوسری طرف عوامی حلقوں کا کہنا ہے کہ پبلک ٹرانسپورٹرز عوام کو لوٹنے میں مصروف ہیں۔ پنڈی مری کا کرایہ 200 روپے سے کم بنتا ہے جبکہ 250 روپے فی سواری وصول کیا جا رہا ہے اگر حکومت کی جانب سے سستی سواری کا انتظام کیا گیا ہے تو یہ ایک خوش آئند بات ہے ٹرانسپورٹرز کو اس بس سروس سے کوئی تکلیف نہیں ہونی چاہئے اور بس سروس کو روکنے کاکوئی جواز نہیں بنتا۔۔