آئی ایس آئی کے شہید ڈائریکٹر نے بے مثال کارنامے انجام دیئے

شہداء کی نماز جنازہ  تین شہروں ملتان، خانیوال اور لاہور میں ادا کی گئیں۔ نماز جنازہ میں ڈائریکٹر جنرل آئی ایس آئی لیفٹیننٹ جنرل ندیم انجم، سول و  ملٹری حکام اور شہدا کے لواحقین نے شرکت کی۔ ڈی جی آئی ایس آئی نے شہدا کے جنازوں کو کندھا بھی دیا۔ انہوں نے شہید افسر کے بیٹے کو گلے لگا کر تسلی دی اور شہدا کو خراج عقیدت پیش کیا۔

نوید صادق کون تھے؟

خانیوال کے قریب دہشت گردوں کی گولیوں سے شہید ہونے والے آئی ایس آئی انسداد دہشت گردی ونگ کے ڈائریکٹر نوید صادق فرائض کی ادائیگی کے دوران جرات و بہادری کی داستانیں رقم کر چکے تھے اور انہیں  23 مارچ 2021 کو  ملک دشمن عناصر کے خلاف ان کی بہادری اور جرات کے اعتراف میں ستارہ شجاعت سے نواز گیا تھا۔

نوید صادق نے بطور سب انسپکٹر 2002 میں پولیس فورس میں شمولیت اختیار کی اور بعد میں مقابلہ کا امتحان دے کر 2009 میں آئی ایس آئی میں بطور اسسٹنٹ ڈائریکٹر تعینات ہوئے۔

انہوں نے اپنی ملازمت کے دوران جان پر کھیل کر  کالعدم تنظیموں کے اہم نیٹ ورکس کو بے نقاب کیا،  کئی ماہ کی کوششوں کے بعد داعش کی اعلیٰ کمانڈ تک رسائی حاصل کی اور فیصل آباد میں ان کی کمین گاہ کا پتہ لگا کر چھاپہ مارا اور دہشت گردوں کو بے اثر کیا۔اسی طرح  انہوں نے گوجرانوالہ میں بھی  خودکش حملہ آوروں کا مردانہ وار  مقابلہ کیا۔

ذرائع کا کہنا ہے کہ سابق وزیر اعظم سید یوسف رضا گیلانی کے بیٹے علی حیدر گیلانی کو اغوا کرنے والے نیٹ ورک کا سراغ  بھی شہید نوید صادق ہی نے لگایا تھا۔اس کے علاوہ انہوں نے اپنی ہی یونٹ کے دو افسران انسپکٹر عمر مبین جیلانی اور سب انسپکٹر یاسر کو شہید کرنے والے کالعدم تنظیم کا نیٹ ورک بھی بریک کیا، واضح رہے کہ شہید کی  اہلیہ بھی انسداد دہشت گردی ونگ میں بطور ڈپٹی ڈائریکٹر کام کر رہی ہیں۔

ذرائع کا کہنا ہے کہ نوید صادق کو خانیوال میں جب دہشت گردی کا نشانہ بنایا گیا اس وقت بھی وہ افغانستان سے آپریٹ ہونے والی ایک کالعدم تنطیم کے نیٹ ورک کو توڑنے کے مشن پر تھے کہ ملزم عمر خان نے انہیں نشانہ بنا کر ان کے ساتھی افسر ناصر عباس سمیت شہید کردیا۔ملزم عمر خان

دریں اثنا ڈائریکٹر نوید صادق اور انسپکٹر ناصر حسین کو ایک تنظیمی نیٹ ورک کے ذریعے شہید کرنے کا مقدمہ درج کرلیا گیا ہے۔  اس مقدمے میں دو افراد نامزد کیا گیا جبکہ ایک ملزم عمر نیازی  پہلے سے ہی سی ٹی ڈی کی واچ لسٹ میں شامل تھا۔

گزشتہ روز  خانیوال کے قریب دہشت گردوں کی فائرنگ کےنتیجے میں سی ٹی ڈی کے افسران نوید صادق اور انسپکٹر ناصر حسین شہید ہوگئے تھے۔