مری بس شٹل سروس آغاز کے دوسرے روز ہی نہ چل سکی

منگل کے روز بھارہ کہو ڈھوک جیلانی سٹاپ سے  براستہ ایکسپریس وے لوئر ٹوپہ تک مری بس شٹل سروس کا سابق وزیراعظم شاہد خاقان عباسی، لیگی رہنما ڈاکٹر طارق فضل چوہدری ، سابق ایم این اے حنیف عباسی اور دیگر نے  باضابطہ افتتاح کیا تھا اور مذکورہ روٹ پر بسیں بھی چلائی گئیں جس کا یکطرفہ کرایہ صرف 100روپے  مقرر کیا گیا تھا لیکن افتتاح کے دوسرے روز ہی یہ سروس مکمل طورپر نہ چل سکی جبکہ بدھ کے روز سارا دن  بھارہ کہو ٹرمینل پر سیاح و مقامی فیملیاں انتظار  کرتی رہیں  اور شام واپس مایوس لوٹ گئیں۔

اس سلسلے میں جب ضلعی انتظامیہ مری  سے رابطہ کیا تو ان کا کہنا تھا اسلام آباد انتظامیہ نے  اس معاملے پر ہم سے کسی نے کوئی رابطہ نہیں کیا  ۔لوئرٹوپہ میں مذکور بس سروس ٹرمینل کے حوالے  سے بہت سے مسائل سامنے آئے ہیں جو امید ہے جلد حل ہوجائیں گے جبکہ عوامی حلقوں نے اس سروس کو فیض آباد سے مری بس اڈہ  تک چلانے کا مطالبہ  کیا ہے۔