کَیہہ پہاڑی زبان واقعی ساہڑی پچھان ای؟

کارواں کےدل سےاَحساسِ زیاں جاتا رہا
۔۔۔۔۔۔۔۔۔۔۔۔۔۔۔۔۔۔۔۔۔ اقبالؒ

کوئی وی فرد یا قوم اس ویلے توڑی کامیابی نیں اچے مقام تک نہئی پوہچی سکنے جس ویلے توڑی انھاں وچ خود اعتمادی نانہہ وہے۔ فطری طور اپر ہک بچے کی اپنے وجود ناں احساس اپنی ماؤ نی حب، ہلس تے محبت نی وجہ نال ہونا۔ اوہ آپنی ماؤ نی چہولی وچ جہڑی زبان سکھناں وہاء اس نی ماء بولی ہونی۔ ماء بولی کسے وی بندے نی پچھان نی مڈھلی اکائی ہونی۔ جس بندے کی اپنی ماؤ یا ماؤ نی بولی سی محروم کری شوڑو اس وچ خود اعتمادی نی کمی ہوئی گشنی تے اوہ تخلیقی صلاحیتاں نے حوالے نال وی کوئی غیر معمولی آدمی نآء بنی سکناں۔

تساں پتہ نآء اس بارے وچ کدے سوچیا یا نانہہ پر میں تے سوچنا یاں تے اکھیں اتھروں تے دل دکھے نال پہریا گشناں جے کیہہ ظلم تے زیادتی ہوئی ساہڑی ماؤُ نی بولی پہاڑی زبان اپر۔۔  تُساں کی پتہ اَیہہ ظلم تے زیادتی کس کیتی؟؟  کَدے تُساں اِس نَیں بارے وچ سوچیا؟ نئیں نا؟؟ اَج ضرور اِس بارے وِچ سوچیا۔۔

اپنی ماؤُ اُپّر یوء ظلم تے یاء زیادتی اَپنے سَکّے پُتراں کیتی۔۔۔۔ اُس کی رُلنے، تڑَفنے، پِٹنے کلُٹنے تے مَرنے تائیں کہلیاں چھوڑی تے۔۔ تے اِسّے اُپّربَس نَئی ہوئی۔۔۔۔بلکن حد یاء ای جے اِس سارے ظلم تے زیادتی اُپّر اَساں کی پشیمانی وی نئی۔

یاء حقیقت ای جے بہوں چِر ہوئی گا۔۔ ویلے اُپّر سفر شروع کرنے آلے بہوں دُور پوہچی گئے۔ اُنھاں ناں سفر وی آسان ہوئی گا۔۔ اَساں حالاں ٹُرے یے نئے آں۔ کَدے سفر چِرکا شروع کیتا گَچھّے تے بہوں مَسلے ہونے۔۔ کُج چِر سی بعد دِیغر ہوئی گشنی۔۔ فر دینہہ ڈُبنے تے اَنہیارا پینے ناں ڈَر۔۔ لُٹنے ناں ڈَر۔۔ مَرنے ناں ڈَر۔۔۔۔ خوف یے خوف ۔۔۔ ڈَر یے ڈَر بندے کی بے حالا کری شوڑناں۔

کج سیانے لوک صلاح دینے جے چھوڑ دیوء اِس ساری کھرپو تالی کی۔  نَویاں نَسلاں انگریزی سِکھّی تے ترقی نِیاں اُچیاں مَنزلاں اُپّر پوہچسن۔۔ ماء بولی کی سِکھنے نال کیہہ لبھسی نیں؟  اساں تے ہن شہراں وچ رہنے آں۔ کدے پہاڑی زبان ختم ہوئی گی تاں وی ساہڑا کیہہ کہاٹا ہوسی؟؟؟  اَساں نیں نکے تے ہن اردو کی وی کہاء وی نیئے باہنے۔۔۔۔ اوہ تے امریکن لہجے وچ انگریزی بولنے۔

"چھوڑو پہاڑی زباناں کی۔۔ یوء سب چَہل یَتّ آ۔۔ دنیا نال ٹُرناں چائیناں۔ انگریزی سکھانے ناں کوئی ادارہ کھولو۔ کھلیاں کمائیاں”
۔۔۔۔۔۔۔
راشد عباسی