اسلام آباد بلدیاتی الیکشن ملتوی کرنے کا کوئی جواز نہیں، میاں اسلم

نائب امیر جماعت اسلامی پاکستان وسابق ممبر قومی اسمبلی میاں محمد اسلم نے کہا ہے کہ الیکشن کمیشن مسلم لیگ ن کی الیکشن سے فرار کی کو ششوں کو ناکام بناتے ہو ئے 31دسمبر کو ہی اسلام آباد میں بلد یاتی انتخابات کے انعقاد کو یقینی بنائے ، اب جبکہ الیکشن میں ایک ہفتہ باقی رہ گیا ہے ایسے میں بلد یاتی قانون میں تبدیلی اور الیکشن التواءکی کوشش بد نیتی پر مبنی ہے ،انھوں نے کہا اب جبکہ الیکشن مہم اپنے اختتامی مر حلے میں داخل ہو چکی ہے اور بلد یاتی اُمیدواروں کے کروڑوں روپے خر چ ہو چکے ہیں ایسے میں الیکشن ملتوی کرنا غیر جمہوری عمل ہے ،ان خیالات کا اظہار انھوں نے بلد یاتی انتخابات کیس کی سماعت کے بعداسلام آباد ہائیکورٹ کے باہر میڈیا سے گفتگو کر تے ہو ئے کیا اس موقع پر حسن جاوید ایدوکیٹ اور چو ہدری ساجد اقبال بھی اُن کے ہمراہ تھے۔
میاں محمد اسلم نے کہاجماعت اسلامی پی ڈی ایم حکومت کو اسلام آباد کے بلد یاتی الیکشن سے فرار نہیں ہو نے دے گی ،مسلم لیگ ن اور اس کی اتحادی جماعتوں کو شکست نظر آرہی ہے ، اس لیے وہ الیکشن ملتوی کروانے کے حیلے بہانے کر رہے ہیں ،، اسلام آباد کے بیس لاکھ سے زائد شہریوں کے حقوق غصب کرنا ظلم ہے وزارت داخلہ کے غیر آئینی قدم کو مسترد کرتے ہیں ،اسلام آباد میں بہت اچھے ماحول میں بلدیاتی انتخابات کا عمل جاری ہے دس روز رہ گئے تو اب حکومت بلدیاتی انتخابات ملتوی کرنے کی سازش کررہی ہے۔