آرمی چیف نے بنوں آپریشن کے زخمی افسران اورجوانوں کی عیادت کی

آرمی چیف جنرل عاصم منیر نے بدھ کے روز سی ایم ایچ راولپنڈی کا دورہ کیا اور بنوں سی ٹی ڈی مرکز پر آپریشن کے دوران زخمی ہونے والے پاک فوج کے افسران اور جوانوں کی عیادت کی، ان کے بلند حوصلے، پیشہ ورانہ صلاحیتوں کو سراہا۔

آئی ایس پی آر کے مطابق آرمی چیف کچھ دیرافسروں اور جوانوں کے ساتھ رہے،ان کی خیریت دریافت کی اور زخمی افسروں اور جوانوں کے بلند حوصلے اور جذبے کو سراہا ۔انہوں نے دہشت گردوں کے خلاف آپریشن کے دوران ان کی پیشہ ورانہ مہارت کی بھی تعریف کی۔

یہ امر قابل ذکر ہے  کہ پاک فوج کے ترجمان میجر جنرل احمد شریف نے بتایا تھا کہ سی ٹی ڈی کمپاؤنڈ پرباہرسے کوئی حملہ نہیں ہوا بلکہ زیرتفتیش دہشت گردوں میں سے ایک نے سی ٹی ڈی جوان کا ہتھیارچھین کرفائرنگ کی تھی، دہشت گرد افغانستان جانے کیلئے محفوظ راستہ مانگ رہے تھے تاہم فورسز نے ان کے فرارکی کوشش ناکام بنادی ۔انہوں نے بتایا کہ آپریشن کے دوران پاک فوج کے صوبیدار اور 2 سپاہی شہید ہوئے۔

بنوں آپریشن  میں 25 دہشتگرد ہلاک،7 نے ہتھیار ڈال دیے، ڈی جی آئی ایس پی آر

پاک فوج کے ترجمان میجر جنرل احمد شریف چوہدری کا کہنا ہے کہ بنوں میں سی ٹی ڈی کے کمپاؤنڈ میں فائرنگ کے تبادلے کے نتیجے میں 25 دہشت گرد مارے گئے جبکہ سات نے سرنڈر کر دیا اور  3 فرار ہوتے ہوئے گرفتار ہوئے۔

آئی ایس پی آر کے ڈائریکٹر جنرل میجر جنرل احمد شریف چوہدری نے دہشت گردوں کے خلاف آپریشن کی تفصیلات بتاتے ہوئے کہا کہ 18 دسمبر کو بنوں میں سی ٹی ڈی کمپلیکس میں زیر تفتیش 35 دہشگرد موجود تھے۔کمپاؤنڈ پر باہرسے کوئی حملہ نہیں ہوا بلکہ سی ٹی ڈی کی تحویل میں ہی دہشتگروں نے یہ صورت حال پیدا کی،زیرتفتیش دہشت گردوں میں سے ایک نے سی ٹی ڈی جوان کا ہتھیار چھین کر فائرنگ کی تھی،دہشت گرد افغانستان جانے کے لیے محفوظ راستہ مانگ رہے تھے تاہم ان کے فرارکی کوشش ناکام بنادی گئی۔

پاک فوج کے ترجمان کا مزید کہنا تھا کہ بنوں میں فائرنگ کے تبادلے میں 25 دہشت گرد مارے گئے 7 نے سرنڈر کیا جبکہ 3 فرار ہوتے ہوئے گرفتار ہوئے، اس کے علاوہ آپریشن میں پاک فوج کا ایک صوبیدار اور 2 سپاہی شہید ہوئے۔ دہشت گردوں کے مطالبے کو رد کردیا گیا،شہدا کی عظیم قربانیاں ہمارے عزم کو بڑھاتی ہیں۔

ترجمان  کا مزید کہنا تھا کہ مغربی سرحد سے دہشت گردی کی جوتازہ لہر ہے اسے ابھرنے نہیں دیا جائے گا، جو ہمارے خلاف آئے گا اس کا سر کچل دیں گے۔ میجر جنرل احمد شریف نے تحریک طالبان پاکستان سے متعلق پالیسی بھی دوٹوک انداز سے واضح کرتے ہوئے کہا کہ کسی بھی قسم کے جتھے یا دہشت گرد گروہ کو پنپنے کی اجازت نہیں دی جاسکتی، حکومت کی رٹ ہرصورت قائم کی جائے گی۔

واضح رہے کہ اتوار کے روز بنوں میں دہشتگردوں نے سی ٹی ڈی کمپاؤنڈ پر حملہ کیا تھا اور اہلکاروں کو یرغمال بنا لیا تھا جس پر سکیورٹی فورسز نے آپریشنکر کے تمام دہشت گردوں کو ہلاک کر دیا۔