چک شہزاد اسلام آباد میں اعظم سواتی کا فارم ہاؤس سیل

اسلام آباد کے علاقے چک شہزاد میں واقع پاکستان تحریک انصاف کے رہنما سینیٹر اعظم سواتی کا فارم ہاؤس سیل کردیا گیا۔

ذرائع کا کہنا ہے کہ سی ڈی اے کے  شعبہ بلڈنگ کنٹرول کی جانب سے اعظم سواتی کی اہلیہ کو گزشتہ ماہ نوٹس بھیجا گیا تھا۔ جس میں کہا گیا تھاکہ فارم ہاؤس میں 2 بیسمنٹ، گراؤنڈ فلور اور گارڈز روم غیرقانونی طور پرتعمیر کئے گئے ہیں۔ جمعہ کی شب پولیس اور سی ڈی اے کی ٹیمیں کارروائی کیلئے  فارم ہاؤس پہنچ گئیں اور فارم ہاوس سے غیرقانونی تعمیرات گرانے کیلئےکارروائی  کا آغازکر دیا گیا،

ذرائع کا کہنا ہے کہ رات گئے کارروائی میں سی ڈی اے نے آرچرڈ سکیم فارم ہاؤس نمبر 34 اور 35 بھی سیل کر دیا گیا، سی ڈی اے کا کہنا ہے کہ اعظم سواتی کے  فارم ہاؤس میں بلڈنگ پلان کی خلاف ورزی کی گئی۔اعظم سواتی کو نیا بلڈنگ پلان جرمانے کی ادائیگی کے ساتھ منظورکرانے کی ہدایت کی گئی ہے۔