کوہسار نیوز 9 دسمبر 2022
شمالی علاقہ جات میں شدید سردی کے ساتھ برف باری کا سلسلہ جاری ہے اور بیشتر پہاڑوں نے برف کی چادر اوڑھ لی ہے۔ نانگا پربت پر 10 فٹ سے زیادہ برف پڑ چکی ہے۔
بابوسر ٹاپ، داریل، تانگیر، گوہر آباد، نیاٹ کے پہاڑوں پر بھی شدید برف باری ریکارڈ کی گئی ہے۔ جس کے نتیجے میں چلاس شہر اور گردونواح میں سردی کی شدت میں اضافہ ہوگیا ہے۔ کئی مقامات پر درجہ حرارت منفی 10 ڈگری سینٹی گریڈ تک پہنچ گیا ہے۔
علاوہ ازیں بالائی علاقوں کے پہاڑوں پر بھی برفباری ہوئی ہے جس سے آس پاس کے علاقوں میں سردی کی شدت بڑھ گئی ہے۔
آزاد کشمیر، مری ،گلیات، ہزارہ ڈویژن اور ملحقہ علاقوں میں سردی میں اضافے کے ساتھ لوگوں کی نقل و حرکت اور سرگرمیاں محدود ہو گئی ہیں۔
