مارگلہ ہلز پر تیندوے کی پراسرار موت کی تحقیقات جاری

دو روز پہلے مارگلہ ہلز پر پراسرار انداز میں ہلاک ہونے والے تیندوے کی موت کے حوالے سے تحقیقات جاری ہیں۔

ابھی تک یہ واضح نہیں ہو سکا کہ نایاب نسل کے اس تیندوے کی موت حادثاتی طور پر واقع ہوئی یا اسے زہر دے کر مارا گیا۔
واضح رہے کہ ابتدائی رپورٹ میں بتایا گیا تھا کہ تیندوے کی موت بلندی سے گرنے کے نتیجے میں دماغ میں اندرونی چوٹ لگنے کے باعث ہوئی ہے تاہم بعض ذرائع کا کہنا تھا کہ اسے تین روز قبل زہر دے کر مارا گیا ہے۔

تیندوا مارگلہ ہلز کے علاقے سنہیاری میں مردہ حالت میں پایا گیا ہے۔

وائلڈ لائف مینجمنٹ بورڈ کے ترجمان کا اس حوالے سے کہنا تھا کہ ابتدائی رپورٹ کے مطابق تیندوے کی موت بلندی سے گرنے کے باعث ہوئی ہے۔ بلندی سے گرنے کےنتیجے میں  چوٹ تیندوے کے دماغ پر لگی ہے۔ تاہم  ہسٹوپتھالوجی رپورٹ کے بعد تیندوے کی موت کے اسباب کا تعین ہو سکے گا۔

واضح رہے کہ  تیندوے کے جسم پر گولی یا تشدد کے نشانات موجود نہیں ہیں۔

مردہ تیندوے کو وائلڈ لائف حکام نے اپنی  تحویل میں لے لیا تھا۔

یہ امر قابل ذکر ہے کہ رواں ہفتے ہی شاہراہ کاغان پر پہاڑی سے گر کر زخمی ہونے والا تیندوا زخموں کی تاب نہ لاتے ہوئے دوران علاج دم توڑ گیا تھا۔

جب کہ اس سے قبل اسی قسم کے واقعات ایبٹ آباد اور آزاد کشمیر کے مختلف علاقوں میں پیش آ چکے ہیں۔

حالیہ دنوں میں  سوشل میڈیا پر سامنے آنے والی آزاد کشمیر کی ایک ویڈیو میں تیندوے کو ایک خاتون اور مرد پر حملہ کر کے بھاگتے ہوئے دکھایا گیا ہے۔