نادرا میں پوٹھوہاری زبان کے دوبارہ اندراج پر کوئی پیش رفت نہ ہوسکی

راولپنڈی /اسلام آباد (فیصل عرفان) نادرا کے ڈیٹا بیس میں پوٹھوہاری زبان کے دوبارہ اندراج پر تاحال  کوئی پیش رفت نہ ہوسکی۔ اس سلسلے میں سپیکر قومی اسمبلی راجہ پرویز اشرف کے پاس ڈیڑھ ماہ سے درخواست موجود ہے۔ چیئرمین نادرا طارق ملک نے صحافی، شاعر اور مصنف فیصل عرفان کی تحریک پر رواں سال نادرا لائبریری میں پوٹھوہاری زبان کا اندراج کیا تھا لیکن صرف 10دن بعد ہی نامعلوم وجوہات کی بناء پر پوٹھوہاری زبان کو سسٹم سے نکال دیا گیا تھا۔
رواں سال فروری میں جب نادرا کی لائبریری میں پوٹھوہاری زبان کو شامل کیا گیا تھا تو پوٹھوہاری کے علمی و ادبی حلقوں نے اس پر بے پناہ مسرت کا اظہار کیا تھا۔  لیکن حیرت انگیز طور پر صرف 10 دن  کے بعد ہی چیئرمین نادرا نے نامعلوم وجوہات کی بناء پر اہل پوٹھوہار کی حق تلفی کرتے ہوئے سسٹم سے پوٹھوہاری زبان کو نکلوا دیا تھا۔