پولٹری انڈسٹری مخصوص درآمدی خوراک کے لیے بضد کیوں؟ چشم کشا رپورٹ

میں نے جی ایم او پر تحقیقی رپورٹ لکھی تھی۔ جس کے مطابق یہ دولت کی خاطر پورے کرہ ارض کو تباہ کر رہے ہیں۔ اس مافیا کی سرغنہ مونسانٹو نامی کھرب پتی کارپوریشن ہے۔ مثال کے طور پر ان کے جی ایم او بیج زبردست پیداوار دیتے ہیں مگر ان کے دانوں کو بطور بیج استعمال نہیں کیا جاسکتا۔ اس لیے اگلی فصل پر دوبارہ ان ہی سے بیج خریدنے کے سوا کوئی چارہ نہیں ہوتا۔  کیوں کہ یہ ہر سال ان بیجوں میں جینیاتی رد و بدل کرتے رہتے ہیں۔

ایک بار جی ایم او فصل کسی کھیت میں اگا دی جائے تو پھر اس زمین پر عام بیجوں والی فصل نہیں اگائی جا سکتی۔ جب کہ چند سال میں وہ زمین مکمل بنجر اور ناکارہ ہوجاتی ہے۔ اگر ان کی جی ایم او فصل کے بیج انھیں ادائیگی کے بغیر کسی دوسرے کھیت میں اگائے جائیں تو یہ اس کاشت کار پر مقدمہ کرکے وصولی کرتے ہیں۔

ان جی ایم او فصلوں کے بیجوں میں کیڑے مار دوا والی تاثیر شامل کی جاتی ہے مگر اس سے کیڑے ہر فصل کے ساتھ جینیاتی طور پر خطرناک ہوتے جاتے ہیں جنھیں ہلاک کرنے کے لیے یہ مزید طاقت ور ادویاتی اجزا شامل کرتے جاتے ہیں۔ ایسے کیڑوں پر عام کیڑے مار دوائیں اثر نہیں کرتیں۔

اس کے علاوہ یہ کھلے ہاتھ سے کسانوں کو قرض پر بیج اور کھادیں وغیرہ دیتے ہیں کیوں کہ ان سے ان کی منہ مانگی قیمت اور شرائط پر جی ایم او بیج خریدنے والا اگلی فصلوں پر بھی ان ہی سے بیج خریدنے پر مجبور ہوتا ہے۔ یوں کسان مسلسل ان کے مقروض ہوتے چلے جاتے ہیں۔ پڑوسی ملک میں ان کی غلامی میں جکڑے بہت سے کسان بے بسی کے عالم میں خود کشی کر چکے ہیں۔

جی ایم او خوراک کی تباہ کاریوں کی ایک الگ لمبی فہرست ہے۔ مختصراً یوں سمجھ لیجیے کہ جی ایم او خوراک سے پیدا ہونے والی بیماریوں اور دیگر طبی مسائل کے شکار مریضوں پر عام اینٹی بائیوٹک دوائیں اثر نہیں کرتی ہیں۔