"شہباز شریف پر جنرل باجوہ کو توسیع دینے کے لیے شدید دباؤ تھا”

انصار عباسی کے مطابق اس تردید کے پیچھے بھی یہ خدشہ موجود تھا کہ کہیں ایسا تو نہیں کہ جنرل عاصم منیرکا نام سمری میں شامل نہ کیا گیا ہو تاہم ان کے ذرائع کی اطمینان بخش رپورٹ تھی کہ یہ نام سمری میں سرفہرست ہے۔ انصار عباسی نے اپنی رپورٹ میں انکشاف کیا ہے کہ جنرل باجوہ کے قریبی حلقوں نے انہیں توسیع دلوانے کے لیے سر توڑ کوشش کی اور اس حوالے سے حکومت پر بھرپور دباؤ ڈالا گیا۔ شہباز حکومت بڑی حد تک اس دباؤ سے پریشان تھی تاہم مسلم لیگ نون کے قائد میاں نواز شریف اپنے فیصلے پر ڈٹ گئے اور انہوں نے واضح کیا کہ فیصلہ سنیارٹی کی بنیاد پر ہوگا،یعنی جنرل عاصم ہی آرمی چیف بنیں گے اور یہ کہ جنرل باجوہ پہلے ہی ریٹائرمنٹ کا اعلان کر چکے ہیں لہذا انہیں اپنی بات پر قائم رہنے کے لیے قائل کیا جائے۔
یہ امر قابل ذکر ہے کہ آرمی چیف کی مدت ملازمت میں توسیع کی تجویز سب سے پہلے تحریک انصاف کے چیئرمین عمران خان کی جانب سے سامنے آئی تھی۔ ذرائع کے مطابق کم و بیش اسی فارمولے کے تحت لیگی قیادت کو یہ پیغام دیا گیا تھا کہ اس دوران اگر نگراں حکومت قائم ہو جاتی ہے تو نواز شریف کی واپسی کی راہ بھی ہموار ہو جائے گی اور ان کے خلاف نا اہلی سمیت مقدمات ختم ہو جائیں گے۔اور ان کی سیاست میں بھرپور واپسی کی راہ ہموار ہو جائے گی تاہم نواز شریف اس پر آمادہ نہ ہوئے۔

انصار عباسی کا کہنا ہے کہ آرمی چیف کی مدت ملازمت میں توسیع کے دباؤ کے تحت ہی وزیراعظم شہباز شریف کو ہنگامی طور پر مصر سے لندن جانا پڑا ، جبکہ خواجہ آصف اور ملک احمد خان کو نواز شریف نے پاکستان سے بلوایا اور ان سب پر یہ واضح کر دیا کہ فیصلہ سنیارٹی کی بنیاد پر ہوگا اور آرمی چیف جنرل عاصم منیر ہی ہوں گے۔