اعظم سواتی دوبارہ کیوں گرفتار ہوئے؟

واضح رہے کہ اس الزام کے تحت ان کے خلاف باقاعدہ ایف آئی آر درج کی گئی تھی۔ انھیں اداروں کے خلاف متنازع ٹوئٹس پر وفاقی تحقیقاتی ادارے (ایف آئی اے) سائبر کرائم نے حراست میں لیا ہے۔

ایف آئی اے کے اہلکاروں نے اتوار کی صبح اعظم سواتی کو چک شہزاد میں واقع ان کے فارم ہاؤس سے گرفتار کیا ہے اور ان کے خلاف سائبر کرائم کی دفعات کے تحت مقدمہ بھی درج کر لیا گیا ہے۔

واضح رہے کہ پی ٹی آئی سینیٹر نے پاک فوج کے اعلیٰ افسران کے خلاف سوشل میڈیا پر ان کے نام لے کر ہرزہ سرائی کی تھی اور سنگین الزامات عاید کیے تھے۔ اعظم سواتی نے افسران کو دھمکی دیتے ہوئے کہا تھا کہ میں ان  خلاف ہر قانونی و اخلاقی فورم کا استعمال کروں گا۔

دوسری طرف تحریک انصاف کے سربراہ عمران خان نے سینیٹر اعظم سواتی کی دوبارہ گرفتاری کی مذمت کرتے ہوئے کہا ہے کہ حیران ہوں ہم کتنی تیزی سے فاشسٹ ریاست کی طرف بڑھ رہے ہیں۔
ان کا کہنا ہے کہ اعظم سواتی کو حراست میں تشدد اور بلیک میل کرنے کی ویڈیو ان کی اہلیہ کو بھیجنے کی تکلیف کو کوئی کیسے نہیں سمجھ سکتا؟ ناانصافی پر اعظم سواتی کا غصہ اور مایوسی جائز ہے۔
چیئرمین پی ٹی آئی کا کہنا ہے کہ اعظم سواتی کی حمایت میں سینیٹرز کی اپیلوں کے 15 دن سے زیادہ گزرنے کے باوجود سپریم کورٹ کے دروازے ان کے لیے بند رہے۔ وہ ٹویٹ کرتا ہے اور دوبارہ گرفتار ہو جاتا ہے۔ اس ریاستی فاشزم کے خلاف سب کو آواز اٹھانا ہو گی۔