شاہد خاقان عباسی نے نیب ختم کرنے کا مطالبہ کیوں کیا ؟

کراچی میں میڈیا سے گفتگو کرتے ہوئے شاہد خاقان عباسی نے مطالبہ کیا کہ نیب کو ختم کرکے ملک کے نظام کو چلانا چاہیے۔ جو آدمی دوسروں کا احتساب کرے وہ سب سے پہلے خود احتساب کے عمل میں شامل ہو۔ اس لیے ضروری ہے کہ سابق چیئرمین نیب جسٹس (ر)جاوید اقبال بھی اپنے اثاثے عوام کے سامنے رکھیں۔

انہوں نے کہا کہ عمران خان آرمی چیف کی تقرری پر اثر انداز ہونے کے لیے مارچ کر کے راولپنڈی  آنا چاہتے تھے۔ یہ معاملہ خوش اسلوبی سے نمٹ چکا ہے۔ تاہم اگر اب وہ نیا تماشا کھڑا کریں گے تو اس کا نتیجہ وہ خود دیکھ لیں گے۔

سابق وزیر اعظم کا مزید کہنا تھا کہ آرمی چیف کی تعیناتی کے معاملے پر بلا وجہ انتشار پھیلایا گیا۔ عمران خان کو اکثر باتیں دیر سے سمجھ آتی ہیں۔

ایک سوال کے جواب میں سابق وزیر اعظم نے کہا کہ روس سے بات کرنے پر امریکا کا کوئی دباؤ نہیں ہے۔ خام تیل حکومت امپورٹ نہیں کرتی بلکہ  یہ کام آئل ریفائنریز کرتی ہیں۔