آرمی چیف کے دو بھائی قاسم اور ہاشم بھی حافظ قرآن ہیں

یہ بات بہت کم لوگ جانتے ہیں کہ آرمی چیف کا عہدہ سنبھالنے والے جنرل عاصم منیر نہ صرف خود حافظ قرآن ہیں بلکہ ان کا پورا خاندان "حفاظ کے خاندان” کے نام سے مشہور رہا ہے۔ ان کے دو بھائی قاسم منیر اور ہاشم منیر بھی حافظ قرآن ہیں۔
جنرل عاصم منیر کے والد سید سرور منیر راو لپنڈی کے علاقے لال کڑتی کے اسکول میں پرنسپل تھے۔ ان کا خاندان دینی رجحان کا حامل رہا ہے اور عاصم منیر کے والد نے اپنے محلے میں ایک مسجد تعمیر کرائی تھی جہاں سینئر صحافی حافظ طاہر خلیل سمیت کئی بچے قرآن پاک پڑھنے جایا کرتے تھے۔
اس حوالے سے حافظ طاہر خلیل کا کہنا ہے کہ ان کے والد اور جنرل عاصم منیر کے والد آپس میں گہرے دوست تھے اور دونوں نے یہ طے کیا تھا کہ اپنے بچوں کو اسکول کی تعلیم دلانے سے پہلے حافظ قرآن بنائیں گے۔چنانچہ ایسا ہی ہوا ، ننھے عاصم منیر نے پہلے قرآن پاک مکمل کیا اور اس کے بعد اسکول میں داخلہ لیا ۔ عام تاثر یہی پایا جاتا ہے کہ ہے کہ عاصم منیر نے 38 برس کی عمر میں حفظ قرآن مکمل کیا جب وہ کرنل کی حیثیت مدینہ منورہ میں تعینات تھے تاہم ان کے بچپن کے دوست حافظ طاہر خلیل  اس حوالے سے قدرے  مختلف کہانی بیان کرتے ہیں ۔ غیر ملکی  نیوز ویب سائٹ  اردو نیوز سے بات کرتے ہوئےحافظ خلیل کا کہنا تھا کہ عاصم  منیر ایک لائق طالب علم تھے اور جب وہ 1974 میں میرے والد صاحب کے مدرسے میں قرآن مجید حفظ کرنے آئے تو انہوں نے صرف دو سال کے اندر حفظ قرآن مکمل کرکے اپنی ذہانت ثابت کردی تھی۔