برفباری سیزن میں سیاحوں اور شہریوں کو ہر قسم کی سہولیات اور فول پروف تحفظ فراہم کیا جائے گا

مری کو ضلع کا درجہ ملنے سے مری اور کوٹلی ستیاں میں تعمیر و ترقی کے ایک نئے دور کا آغاز ہوگا وزیر اعلیٰ پنجاب چوہدری پرویز الہیٰ کا مری کو ضلع کا درجہ دیے جانے کا بنیادی مقصد ہی علاقہ کی بہترین اور ترجیحی بنیادوں پر ترقی دینا ہے۔

سیاحوں کو پارکنگ کی سہولیات کی فراہمی کے لیے جھیکاگلی میں پارکنگ پلازہ کی تعمیر جلد شروع کردی جائے گی۔ مری اور کوٹلی ستیاں کے عوام کو روزگار کے مواقع بھی فراہم ہوں گے۔  ضلع بننے کے بعد تمام محکموں میں ہزاروں ملازمین بھرتی کئے جائیں گے، جس سے علاقہ میں بیروزگاری کا خاتمہ ہو گا۔

صحت، تعلیم، زراعت، لائیو سٹاک کے معاملات کو بہتر بنایا جائے گا اور غیر فعال اداروں کو فعال کیا جائے گا۔

ان خیالات کا اظہار ڈپٹی کمشنر ضلع مری احمد حسن رانجھا نے پہلے ڈپٹی کمشنر مری کا عہدہ سنبھالنے کے موقع پر سیاسی، سماجی، کاروباری و صحافتی شخصیات کے وفود سے ملاقات پر کیا۔ وفود میں ہوٹل ایسوسی ایشن مری ( رجسٹرڈ )کے جنرل سیکرٹری راجہ یاسر ریاست عباسی، ہوٹل ایسوسی ایشن کے ایڈیشنل جنرل سیکرٹری سلیم اکابر عباسی، سٹیزن فورم مری کے سرپرست اعلی راجہ مسعود آصف عباسی، مسلم لیگ ق تحصیل مری کے صدر راجہ ظہور عباسی اور دیگر شامل تھے۔

ڈپٹی کمشنر ضلع مری احمد حسن رانجھا نے کہا کہ ضلع مری کا ریونیو بڑھانے کے لیے بھی اقدامات کیے جا رہے ہیں تاکہ کثیر فنڈز کے حصول کو یقینی بنایا جائے۔ مری میں دیگر اہم پوسٹوں پر بھی جلد تعیناتیاں مکمل ہو جائیں گی۔  اس موقع پر اسسٹنٹ کمشنر مری صاحبزادہ محمد یوسف، اسسٹنٹ کمشنر کوٹلی ستیاں فروا بتول، ڈی ایس پی ٹریفک مری عرفان حیدر، نائب تحصیل دار مری محمد جمال نذیر اور دیگر سرکاری افسران بھی موجود تھے۔