ہزارہ کے پہلے سالڈ ویسٹ مینجمنٹ پلانٹ کو فعال کر دیا گیا

تقریب میں پراجیکٹ منیجر آکسفیم پاکستان فرح منور نے اپنے خطاب میں کہا کہ اس منصوبہ کی بروقت کامیاب تکمیل ٹیم ورک کا نتیجہ ہے۔ مستقبل میں اس کی بہتری کے لئے مزید اقدامات اٹھائے جائیں گے۔ واسا کی گورننگ باڈی نے ہر موقع پر تعاون کیا ۔ عوام اس کو کامیابی سے چلانے کے لئے واسا کے ساتھ بھرپور تعاون کریں، تاکہ ماڈل معاشرہ کو تشکیل دینے میں معاونت مل سکے ۔ انہوں نے کہا کہ سالڈ ویسٹ مینجمنٹ کی ملک میں کوئی بہترین مثال موجود نہیں ہے۔ ایبٹ آباد میں ماڈل ویلج کے لئے واسا کا آکسفیم سے کام کا بہترین تجربہ رہا ہے۔ ان کی ٹیم نے بڑی تندہی سے کام کو سرانجام دیا، جو شروع میں بہت مشکل لگ رہا تھا ۔

چئرمین بورڈ آف ڈائریکٹر میجر (ر) ذوالفقار احمد نے اپنے خطاب میں کہا کہ مسلمان کے لیے صفائی ایمان کا حصہ ہے۔ لیکن ہمارے ہاں المیہ یہ ہے کہ ہم اپنے لیے اور اصول اور توقعات جب کہ دوسروں کے لیے الگ اور مختلف رویہ رکھتے ہیں۔ عوام کے تعاون کے بغیر ایسے منصوبوں کو کامیاب بنانا ممکن نہیں ہے۔ اس منصوبہ کی پراجیکٹ منیجر فرح منور اس کو کامیابی سے چلانے میں اپنا ساتھ جاری رکھیں اور اس پلانٹ کے سولر سسٹم سے انسلاک کے لئے فنڈز مہیا کرنے میں کردار ادا کریں۔ تقریب میں ایگزیکٹو آفیسر واسا، انجنیر ریحان یوسف کا کہنا تھا کہ واسا دستیاب وسائل کے ساتھ جہاں تک ممکن ہوگا بہترین سہولیات فراہم کرے گا اور پانی کی تقسیم میں مشینری کو سولر سسٹم پر منتقل کرنے کی کوشش کریں گے تاکہ بلز کو کم سے کم کیا جاسکے۔ اس موقع پر وارڈ 11 کے چیئرمین عامر فضل کا کہنا تھا کہ وارڈ کو مثالی بنانا مسلسل محنت و کاوش کا ثمر ہے ۔ وارڈ میں کچرے کو ٹھکانے لگانے کے لیے کچن کا کچرا باقی کچرے سے الگ کرنے کے لیے ہر گھر میں علاحدہ باسکٹ فراہم کی گئی ہیں۔ سالڈ ویسٹ پلانٹ تک منتقل کرنے کے لئے 25 اہلکاروں پر مشتمل عملہ موجود ہے جن کے پاس دستی ریڑھیاں اور دو رکشہ گاڑیاں موجود ہیں۔ ان انتظامات سے وارڈ کو صاف رکھنے میں مدد ملے گی۔ انہوں نے اس بات پر زور دیا کہ اس طرح کے ماڈل پراجیکٹ کے دائرہ کار کو شہر کی دیگر ملحقہ کونسلوں تک پھیلایا جائے۔