مسلم لیگ ن کے رہنما اوورسیز پاکستانی سردار وقار عباسی نے ڈسٹرکٹ ہیڈکوارٹر ہسپتال، بے نظیر بھٹو ہسپتال ایبٹ آباد میں ڈاکٹروں کی مبینہ غفلت کی وجہ سے معصوم بچے کو غلط انجکشن لگا کر اس کی زندگی کو خطرے میں ڈالنے کی شدید الفاظ میں مذمت کرتے ہوئے کہا کہ ذمہ دار ڈاکٹروں کے خلاف فوری کارروائی عمل میں لائی جائے ۔
سرکل بکوٹ، ایبٹ آباد کی یونین کونسل پٹن کلاں کے رہائشی سلیم قریشی کے معصوم بچے کو چھاتی کا انفیکشن ہوا تو وہ اسے بے نظیر بھٹو ہسپتال ایبٹ آباد لے کر گیا۔ جہاں ڈاکٹروں کی مبینہ غفلت اور لاپرواہی کی وجہ سے غلط انجکشن لگانے کے نتیجے میں بچے کے سر میں دانہ نکل آیا، جو بعد میں سوراخ کی شکل اختیار کر گیا ۔
ہسپتال انتظامیہ اور ڈاکٹروں نے سلیم قریشی کو 80 ہزار کا بل تھما دیا۔ سردار وقار عباسی نے اس سارے واقعے کی تحقیقات کا مطالبہ کرتے ہوئے اعلی حکام سے فوری نوٹس لینے اور ڈاکٹروں کے خلاف سخت ترین کاروائی کا مطالبہ کیا ہے۔ انھوں نے کہا کہ اگر ڈاکٹروں کے خلاف فوری کارروائی نہ گی گئی تو اہل علاقہ شدید احتجاج کرنے پر مجبور ہوں گے۔ انھوں نے مطالبہ کیا کہ اس طرح کے ڈاکٹروں کے لائسنس فوری طور پر معطل کیے جائیں تاکہ دوبارہ کسی معصوم کی زندگی خطرے میں نہ ڈالی جا سکے۔ اس حوالے سے ابھی تک ڈسٹرکٹ ہیڈکوارٹر ہسپتال ایبٹ آباد کا موقف سامنے نہیں آیا۔
