کوہالہ پل پر خودکشی کرنے والے شخص کی دل خراش ویڈیو سامنے آگئی

کوہالہ پل سے دریائے جہلم میں میں کود کر خودکشی کرنے والے شخص کی دل خراش ویڈیو سامنے آگئی۔ ویڈیو میں دیکھا جا سکتا ہے کہ لگ بھگ پچاس برس کا ایک صحت مند شخص  جس نے سفید شلوار قمیض پر سویٹر پہن رکھی ہے ،پہلے کوہالہ پل کے نچلے حصے کی ریلنگ سے لٹکتا ہے ۔ پھر ایسا لگتا ہے کہ چند سیکنڈ سوچ بچار کے بعد وہ خود کشی کے اپنے فیصلے کو عملی جامہ پہناتے ہوئے دریا میں چھلانگ لگا دیتا ہے۔
جمپ لگاتے ہوئے وہ اس بات کا دھیان رکھتا ہے کہ خشکی کے بجائے سیدھا دریا میں جا لگے ۔ خود کو دریائے جہلم کی بے رحم موجوں کے حوالے کر کے موت کو گلے لگانے والے ایک جیتے جاگتے جاگتے شخص کی زندگی کے آخری لمحات کی یہ کہانی دریا کے کنارے موجود کئی موبائل فون کیمروں میں محفوظ ہو رہی ہوتی ہے ، اور کچھ لوگ یہ تبصرہ بھی کرتے سنائی دیتے ہیں کہ یہ شخص یا تو پاگل ہے، یا پھر لوگوں کی توجہ حاصل کرنے کیلئے ایسا کر رہا ہے،مگر دوسری طرف اس شخص کا نام اور بیوی بچے اچانک ” غیر محفوظ ” ہو جاتے ہیں مگر ان کی کہانی کو کیمرے کی آنکھ میں قید کرنے والا کوئی نہیں۔( کوہسار نیوز کے پاس خودکشی کے اس منظر کی ویڈیو موجود ہے تاہم صحافتی اخلاقیات کے پیش نظر یہ ویڈیو پوسٹ نہیں کی جا رہی )