ہوشاب میں سکیورٹی فورسز کا خفیہ معلومات پر آپریشن، 2 دہشتگرد ہلاک

لاہور ( کوہسار نیوز) بلوچستان میں سکیورٹی فورسز نے خفیہ معلومات پر کیے گئے آپریشن کے دوران دو دہشت گرد ہلاک  کر دئیے۔
پاک فوج کے شعبہ تعلقات عامہ ( آئی ایس پی آر ) کی طرف سے جاری کردہ بیان کے مطابق خفیہ معلومات پر بلوچستان کے علاقے ہوشاب میں بلور کے مقام پر آپریشن کیاگیا، آپریشن ان دہشتگردوں کیخلاف شروع کیا گیا جو سکیورٹی فورسز، شہریوں پر فائرنگ اور ایم 8 موٹروے پر دیسی ساختہ بم نصب کرنے والے تھے۔
بیان کے مطابق علاقے کی مسلسل انٹیلی جنس نگرانی اورجاسوسی کے نتیجے میں دہشتگردوں کے مقام کی نشاندہی کی گئی اور جوانوں کو علاقے میں اُتارنے کے لیے سکیورٹی فورسز کو ہیلی کاپٹر کا استعمال کرنا پڑا، اسی دوران سکیورٹی فورسز اور دہشتگردوں کے درمیان فائرنگ کا شدید تبادلہ ہوا۔
شدید فائرنگ کے تبادلے میں دو دہشتگرد مارے گئے،جن کے قبضے سے آئی ای ڈیز سمیت اسلحہ اور گولہ بارود کا ذخیرہ برآمد کیا گیا۔