ڈسٹرکٹ خطیب مولانا عبدالواجد کی ڈائریکٹر کامسیٹس یونیورسٹی ایبٹ آباد پروفیسر ڈاکٹر محمد معروف شاہ سے ملاقات

مولانا عبدالواجد نے مزید کہا کہ دینی و اخلاقی تربیت کا نہ ہونا قوموں کو زوال اور پستی کی طرف لے جاتا ہے۔ تعلیمی اداروں میں ایسے پروگراموں کا ہونا لازمی ہے جن سے نوجوانوں کی تعلیم کے ساتھ اخلاقی تربیت بھی ہو۔ اساتذہ و طلبا کے لیے ضروری ہے کہ وہ زیادہ سے زیادہ دینی علوم کے فروغ میں اپنا کردار ادا کریں۔ دین فطرت انسان دوستی، اخوت، رواداری، اسلامی مساوات، باہمی تعاون اور صبر و تحمل جیسے اوصاف پیدا کرتا ہے۔ نئی نسلوں کی ان خطوط پر کردار سازی کر کے ہم دنیا میں اپنا کھویا ہوا مقام حاصل کرنے میں کامیاب ہو سکتے ہیں۔
اِس موقع پر ڈائریکٹر کامسیٹس یونیورسٹی ایبٹ آباد پروفیسر ڈاکٹر محمد معروف شاہ نے کہا کہ کامسیٹس یونیورسٹی ایبٹ آباد کیمپس میں نہ صرف اندرون ملک بلکہ دنیا کے دیگر ممالک سے بھی طلبا تعلیم حاصل کر رہے ہیں۔ ادارے میں نصابی سرگرمیوں کے ساتھ ساتھ غیر نصابی سرگرمیوں پر بھی خصوصی توجہ دی جاتی ہے۔ یونیورسٹی میں مختلف سوسائٹیاں تشکیل دی گئی ہیں جو طلبا کی صلاحیتیں نکھارنے میں اہم کردار ادا کر رہی ہیں۔ ان میں سیرت النبی ؐسوسائٹی، کامسیٹس لٹریری سوسائٹی شامل ہیں۔تعلیمی ادارے کی سب سے پہلی اور اولین ذمہ داری طلبا کی علمی، ذہنی اور فکری استعداد بڑھانا ہے۔