سندھ کے شہر سیہون میں ٹول پلازہ کےقریب انڈس ہائی وے پر مسافر وین گڑھے میں گر گئی جس کے نتیجے میں 12 بچوں سمیت 20 مسافر جاں بحق اور 15 زخمی ہوگئے۔
پولیس کے ذرائع سے ملنے والی تفصیل کے مطابق سہون کے قریب انڈس ہائی وے پر سیلابی پانی کے اخراج کے لیے کٹ لگائے گئے تھے، تاہم حیرت انگیز طور پر 2 ماہ گزرنے کے بعد بھی گڑھے کو پُر نہیں کیا گیا جس کے باعث حادثہ پیش آیا، جاں بحق ہونے والے مسافروں کی لاشوں اور زخمیوں کو عبداللہ شاہ انسٹیٹیوٹ آف میڈیکل سائنسز منتقل کیا گیا ہے۔
ایس ایس پی عمران قریشی نے تصدیق کی ہے کہ اس المناک حادثے میں20 افراد جاں بحق اور 13زخمی ہوئے ہیں۔
اسپتال ذرائع کے مطابق جاں بحق افراد میں 8 خواتین، 6 بچے اور 6 بچیاں شامل ہیں، بچوں کی عمریں 10سے 15سال کے درمیان ہیں،جبکہ 2 زخمیوں کی حالت نازک بتائی جا رہی ہے۔
ڈی سی جامشورو کا کہنا ہےکہ مسافروین میں 33 افراد سوار تھے، حادثےمیں 20 افراد جاں بحق ہوئے، 13کو زندہ نکال لیا گیا ہے جنہیں طبی امداد دی جا رہی ہے۔
