نمک حرام حویلی تے غردار در

جعفر از بنگال، صادق از دکن
ننگِ ملت، ننگِ دیں، ننگِ وطن

صرف یوء شعر یے اس موضوع اپر ضرب المثل ناء بلکن بنگلہ دیش وچ اس غرداری نیاں نشانیاں (یادگاراں) وی موجود یاں۔ مغربی بنگال نے قصبہ مرشد آباد وچ، لال باغ نے علاقے وچ، ماہیماپور نے نزدیک بدنصیب’’نمک حرام حویلی‘‘ ای۔ یا حویلی کسی زمانے وچ ’’قصر میر جعفر‘‘ یا میر جعفر نے محل نے طور اپر جانی گشنی ایسی۔ اتھیں برٹش ایسٹ انڈیا کمپنی نی طرفا مقرر کیتے گئے نواباں وچا سب سی پہلے نواب ’’سید میر جعفر علی خان بہادر‘‘ ناں کہر سا۔ میر جعفر اپنی قوم نے نال غرداری کیتی تے انگریزاں نے نال رلی تے نواب سراج الدولہ جیہے ’’شناختِ ملّت‘‘ شخص کی سکھناں مکھناں کری شوڑیا ایس۔ انگریزاں انعام وچ میر جعفر کی یے بنگال ناں نواب بنائی شوڑیا تے اعلان کیتا نیں کہ ’’یو بنگال ناں پہلوٹھا آزاد نواب‘‘ آ۔

اج علاقے نے لوک فقط محل کی یے ’’نمک حرام ڈیوڑھی‘‘ نیہے آخنے بلکن اس نیں وخ گشنے والے در (گیٹ) کی وی غردار در (غدار گیٹ) آخیا گشناں۔ یاء حویلی میر جعفر ناں کہر سا۔ ہن یاء حویلی کھولیاں (کھنڈرات) وچ تبدیل ہوئی چکی ای۔ یاء بہوں حیریانی نی گل نیہی جے ہتنی صدیاں سی بعد وی اج توڑی اس علاقے وچ رہنے والے یا اس علاقے نے آس پاس رہنے والے لوک خاہ مخاہ تے بغیر کسے وجہ سی لاذم (شرمسار) رہنے ہوسن۔

ہک گل جیہڑی کدے نیہی پہلنی چائینی جے

’’تاریخ کدے معاف نیہی کرنی‘‘۔

خُدا معاف کری شوڑناں، ماء پے معاف کری شوڑنے، تھانیدار معاف کری شوڑناں، جج معاف کری شوڑناں، اتھیں تک ۔۔۔۔ جے لوک وی معاف کری شوڑنیں۔۔۔۔۔ پر۔۔۔۔

تاریخ کدے وی معاف نہی کرنی۔

تساں نے اسے نائیں (نام) کی، جیہڑا تساں کی بہوں پیارا ہونا آ، ہک اجیہی گال بنائی شوڑنی جسی عام لوک ماؤ پہنو نی گال سی وی زیادے برا سمجھنے اے۔

۔۔۔۔۔۔۔لخت : ادریس آزاد۔      (ترجمہ۔۔ راشد عباسی)