مری میں بدترین گیس لوڈ شیڈنگ سے چولہے ٹھنڈے

مری میں سردی کی شدت میں اضافے کے ساتھ ہی گیس سپلائی بند ہونے سے چولہے ٹھنڈے ہو گئے ۔۔ شدید مشکلات کے شکار شہریوں نے متعلقہ حکام سے نوٹس لینے کا مطالبہ کیا ہے۔
ملکہ کوہسار مری میں گزشتہ تین چار روز سے شدید بارشوں اور یخ بستہ برفانی ہواؤں نے لوگوں کو گھروں تک محدود کردیا ہے مگر مشکل یہ پیش آرہی ہے کہ دوسری طرف گیس لوڈشیڈنگ کے باعث گھروں کے چولہے ٹھنڈے پڑے ہیں اور گیس ہیٹر چلنے سے قاصر ہیں ، جس کی وجہ سے سردی کو انجوائے کرنا تو درکنار ، زندہ رہنا بھی دوبھر ہوگیا ہے.
مری کے قصائی محلہ ، لوئر بازار ، حاجی گلی ، شوالہ، ہل ڈھولو اور دیگر علاقوں کے عوام شدید سردی میں ٹھنڈے چولہوں کے ساتھ پریشانی کا شکار ہیں۔ متاثرہ متعلقہ علاقوں کے عوام نے متعلقہ حکام سے مطالبہ کیا ہے کہ صورتحال کا فوری نوٹس لیا جائے اور گیس کی بندش کے مسئلہ کا حل نکالا جائے۔